【曾智華專欄】月餅養起成個集團

飲食老行尊指出，做飲食業，日日開舖猛切猛炒，做到手指出血，也只會得到蠅頭小利，所以，一定要攻陷幾個大季節：一、農曆年；二、端午節；三、中秋節。

因為三大節日若能售出海量年糕、糭子及月餅，即能終年盈利無憂。上述三項食品皆毛利極高，尤其年糕及月餅，誇張啲講，足夠養起成間食肆一年支出。

尤其是美心集團。呢個巨無霸飲食集團並冇上市，所以盤數不用公開，可以神神秘秘。

等我話你知，其實這集團旗下品牌多不勝數，大部分你根本不會聯想到「美心」兩個字。

但打正「美心」旗號的某種每年一度出品，可靠線人通報，利潤絕對驚人，分分鐘養起成個集團，四個字形容：深不可測。

你一定估到，正是「美心月餅」。眾多花款之中，最犀利為雙黃白蓮蓉月，1998年面世後，連續二十六年成為香港第一暢銷月餅，不單止在香港，更包括全球有華人的城市。

每年究竟賣幾多盒？又係一個秘密，但單單呢款月餅，其數量之勁，已足可包起不少養鴨（取蛋做鹹蛋）及種植湘蓮的農場。

有樣知識幾有趣，原來食麵包要食新鮮出爐的，但月餅則萬萬不可，必須先閒置七至十四日後進食，其口感才算完美。因月餅必須經過一個「回油」過程，「回油」即將出爐的月餅靜置，讓蓮蓉及蛋黃的油分慢慢滲出。當餅皮吸收內餡的油分及水分後，就會變得光亮，細細咀嚼時，自會體現其鬆化與油潤。

其實調製任何精彩的食物，皆一項藝術。

說來，美心月餅如此正斗，但很奇，同一集團出品的各款年糕，則⋯⋯水準拍馬追唔上，究竟點解？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。