【曾智華專欄】快樂的周末早上

周末，我通常會主動放鬆心情，製造喜悅，因此有兩樣事必做。

第一，早餐前到7仔買齊報紙及換散銀，點解？因要尋找快樂泉源！

凡周末就是賣旗日，每個街角及港鐵站出口皆有「布陣」。買旗捐助慈善機構，等於幫助有需要的人，能施是福氣！越多施越多快樂，揸住散銀買下一個又一個。

然後開開心心入茶記，見到老友經理梅姐，講聲：「早晨，照舊。」所有嘢立即搞掂。

周末睇報紙，除非爆炸性新聞，否則若又係俄烏戰爭、以巴衝突、「狂特」罵人⋯⋯睇咗壞心情，一概當全部冇到，成疊新聞版抽起。

咁睇乜？嘻嘻，娛樂版是也，懶理佢真定假，純粹八卦吓。

頭條主角為無記「男一」黃宗澤（Bosco），A報大標題：奄尖母把關，入門唔簡單，黃宗澤不婚主義，杜絕「有心人」埋身。

B報另一角度：黃宗澤自認重友輕色難覓女友，首要條件是好兄弟接受，兄弟一「藐」就拜拜。

單單兩條標題已令我樂不可支，真想搵人開壇逐點分析。不過，當然唔能夠似隔籬枱的士大叔及肥師奶團咁，大大聲亂噴啦。

咁點搞？唯有自己同自己講囉，包括以下幾點。其實列出之後，心中已有結論：「祝黃宗澤好運」，原來佢快四十四歲人，好多關於人性的事，仍似有點朦朦，故才會講出：

一、找對象，首要條件是好兄弟們接受，若果佢哋唔接受，就會與對象講拜拜。

二、阿媽為佢搵女友把關，過往見過的，十個有九個半都唔滿意，非常奄尖。

三、做嘢一味可以六親不認，過往只發展「地下情」。

四、每月掟七位數字營運旗下餐廳，更投資拍電影。

睇完以上四項，為乜我要祝Bosco好運呢？明天繼續。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。