恒指真假突破暫未能確定｜古天后

8月26日，大致天晴，局部地區有驟雨，日間天氣酷熱。美股上周表現強勁，鮑爺喺Jackso Hole央行年會上放鴿，表示已到咗調整利率政策嘅時機，此舉意味聯儲局9月議息會議將作出減息決定，而且可能唔止減0.25厘，亦有機會減0.5厘。消息牽動美股造好，道指，納指及標指均升逾1%。

本周焦點為美國PCE數據

展望本周，市場焦點將會係周五公布嘅美國7月PCE數據。雖然鮑爺已表明9月開始減息，但減息幅度仍然係市場焦點，所以PCE仍值得關注。另一個焦點係科技巨擘Nvidia周三公布季績，其他較具瞄頭嘅企業季績包括Best Buy、戴爾、Salesforce及Lululemon等等。

KeyBanc分析員John Vinh表示，Nvidia嘅新AI晶片Blackwell將錄得強勁訂單，推動其股價造好。PCE方面，經濟師估計7月PCE指數將按年升2.6%，前一月為2.5%；按月料升0.2%，前一月為0.1%；核心PCE指數按年料升2.7%，高於前一月嘅2.6%；按月料升0.2%，與前一月相同。

美銀不信經濟「軟着陸」

高盛經濟師Jan Hatzius向客戶表示，若然9月初美國公布嘅就業數據較預期差，則聯儲局可能減息0.5厘。Capital Economics經濟師Jonas Goltermann仍認為，聯儲局將於9月減息0.25厘。

不過，美國銀行首席投資策略師Michael Hartnett表示，通脹回升及就業市場疲軟難以帶嚟「軟着陸」前景，減息唔一定利好股市。Hartnett唔認為鮑爺放鴿降低咗美國經濟硬着陸風險。佢表示，聯儲局降息將出於經濟衰退，而非為「軟着陸」前景，而歷史上呢個情況往往會帶來股市崩盤。因此，Hartnett仍睇好美債，尤其係30年期美債，認為係可以應對第4季硬着陸風險上升嘅最佳對沖工具。

恒指9月唔排除會再破底

美國減息高唱入雲，美匯指數跌至100.6，係去年7月跌穿100大關以來低位，人民幣兌美元則升至逾7個半月高位，帶動港股近3周反覆向好。上周恒指重越10周線17535，本周初向上挑戰20周線約17800關口阻力，須以大成交向上突破，方可扭轉由5月高位19706至今跌勢，否則由16441至今升勢仍只視作反彈。若然未能突破前頂18317，即7月上旬高位，9月唔排除會再破底。

再睇返恒指本身技術走勢亦唔算特別強勁，上星期全周高低相差僅453點，為6月10日至今一周最窄波幅。而恒指上周三（21日）輕微裂口低收，於19日、20日、22日、23日嘅日內高位均稍稍下移，而過去5個交易日，主板成交額未見一日超過1,000億元，因此恒指喺成交相對淡靜嘅市況升穿50日線，暫時只宜視為假突破。今日即市支持為50日線約17540點，亦為10周線所在，初步阻力為20周線約17800。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。