「折骨」Ben轉做獨立歌手年底出自創歌 再戰舞蹈賽自爆沖涼拉筋度橋最有效丨獨家
《全民造星III》冠軍「折骨」Ben(趙祥誠)離開舊公司後沉寂一時,最近終有新搞作參加《第二屆Red Bull Dance your Style跳舞比賽》,望透過比賽令更多人認識折骨舞。為備戰他笑指連食飯沖涼都周身郁,更自爆沖涼時拉筋和度橋最有效。計劃年底出自創歌轉做獨立歌手的他,訪問獲家姐和參加《聲夢傳奇2》妹妹Maggie(趙頌宜)撐場,他透露一家人都愛唱歌,他自小靠陪媽咪唱粵曲培養唱歌興趣。採訪:杜杜 攝影:譚志光 場地:Boogie Renaissance Studio
Ben解釋雖已出道,但對跳舞熱情不減,決定今次再參賽,「好多人或者屋企人會同我講,你跳舞咁激烈好易受傷,但我覺得趁仲後生試多啲,加上呢個比賽着重表演性,係我專長,唔係純粹Battle對戰,仲有同觀眾互動,做啲好炸嘅招,睇到其他國家開始搞時已好想參加,但之前撞咗其他嘢,今次終於參加到。」他坦認參賽仍有壓力,「最大挑戰可能有啲人都睇過折骨或者跳舞,都要做到新嘅方式畀大家睇。」他想勝出代表香港去印度再戰,「由細到大都好想代表香港去做啲嘢,特別今年睇到奧運跳舞都係運動,亞洲嚟講跳折骨嘅人唔算多,希望可以帶到多啲呢種表演方式畀佢哋睇。」
![Ben早前出席《第二屆Red Bull Dance your Style跳舞比賽》記招。 Ben早前出席《第二屆Red Bull Dance your Style跳舞比賽》記招。](https://image.hkhl.hk/f/1024p0/0x0/lr/sthl/dddb580d7e42fadf637f6a923c6e9344/2024-08/04_1_18.jpg)
到學校教學生跳舞
參賽前Ben做了不少準備,除聽多些不同類型歌曲,無時無刻練舞亦不少得,「一有時間就會跳,甚至食飯、沖涼都會周身郁。」食飯周身郁媽咪唔鬧?他笑言:「佢可能睇慣咗,已經唔會講啲乜嘢。」他又解釋比起練習,反而花更多時間度橋,「到時要即興,DJ打歌係唔同style,要諗點樣應付,反而要諗更多嘢。」而他認為沖涼時構思效果特別好,「唔知點解沖涼對於我係個好大嘅啟發點,之前《造星III》有round做恐怖片,我都係沖涼時諗出嚟,可能好靜畀我去諗嘢、放鬆,同埋沖涼時拉筋會有效啲,哈哈!係自己習慣。」
![Ben《造星III》時《恐怖片》的演出,全靠沖涼時搵到靈感。 Ben《造星III》時《恐怖片》的演出,全靠沖涼時搵到靈感。](https://image.hkhl.hk/f/1024p0/0x0/lr/sthl/299e7c01b9eba5e88ea296948b21d40c/2024-08/Ben_01.jpg)
![Ben《造星III》時《恐怖片》的演出,全靠沖涼時搵到靈感。 Ben《造星III》時《恐怖片》的演出,全靠沖涼時搵到靈感。](https://image.hkhl.hk/f/1024p0/0x0/lr/sthl/3b6b45bc611890d082200ef4ed95f468/2024-08/WhatsApp_Image_2020-12-17_at_11_27_34_AM.jpeg)
去年約滿寰亞後,Ben花了很多時間到學校分享及教小朋友跳舞,他很享受這種傳承的工作,「可能只係1、2次workshop,但好開心分享自己識嘅嘢,又可以等啲學生去嘗試吓。」提到《全民造星V》的鄧家杰受他影響愛上折骨舞,他覺得這件事很神奇,「𠵱家都唔係好接受到,人哋會因為我而改變,好不可思議,我成日覺得自己表演冇乜意義,呢2、3年好多人同我講,令我有好大轉變,開始相信自己做嘅嘢,我可能就係呢個角色,做一啲人哋唔做嘅嘢,亦影響到我參加呢個比賽。」這些鼓勵說話,除了屋企人講,還有一班《造星III》的戰友,「旨呈佢哋同我比較近,會close啲,對我鼓勵好大。」
![Ben出席school tour活動,大展舞技。 Ben出席school tour活動,大展舞技。](https://image.hkhl.hk/f/1024p0/0x0/lr/sthl/cc5d388baa963c3087b48ad68b383959/2024-08/ben_1_.jpg)
![Ben感激旨呈(右三)等《造星III》戰友鼓勵,令自信大增。 Ben感激旨呈(右三)等《造星III》戰友鼓勵,令自信大增。](https://image.hkhl.hk/f/1024p0/0x0/lr/sthl/d427a2f390967a8178c85963f88c6ef9/2024-08/0_14.jpg)
增自信做獨立歌手
自信大增,亦令Ben夠膽向獨立歌手發展,更嘗試創作歌曲,「儲埋都有8到10首demo,之後會出。」他認為獨立歌手形式更適合他,「好似跳舞咁,我好多嘢都係free style,適合多啲自己設計,唔知啲歌大家鍾唔鍾意聽,但對我嘅創作都有少少信心,希望完成到1個專輯或者一啲作品,心願係畀自己諗法大家睇。」他透露創作曲風比較另類,「可能我有啲反叛,想做啲暫時好少人做嘅嘢,或者貼近啲國際或歐美巿場嘅曲風,好似我跳折骨舞咁,當時冇人睇過,冇出現過我就好想去做。」他已有時間表重返樂壇,「有1、2首歌差不多做好,差少少就可以推出,希望今年內會得。」
![Ben在舊公司曾推出歌曲《粉身碎骨》。 Ben在舊公司曾推出歌曲《粉身碎骨》。](https://image.hkhl.hk/f/1024p0/0x0/lr/sthl/1803baf1cdb6f5c0962e609163c49c49/2024-08/13_2_4.jpg)
![Ben在舊公司曾推出歌曲《我在每個宇宙都》。 Ben在舊公司曾推出歌曲《我在每個宇宙都》。](https://image.hkhl.hk/f/1024p0/0x0/lr/sthl/23539f89355a87aabb1664094b9c1494/2024-08/527A6770.jpg)
訪問當日,Ben由有「城巿畫家」之稱的家姐Elaine(趙綺婷)和妹妹Maggie陪同到場,他大讚已做回他經理人的胞姐能幹,「佢都好勁,有自己工作,畫畫上面嘢,同時會兼顧屋企大大小小嘅嘢,顧掂自己外,仲顧埋我啲嘢。」而出任小助手的妹妹,他就讚她參加《傳奇2》後令她刮目相看,「佢性格好似我,比較內向,一開始比較擔心佢呢個性格,好似人哋擔心我一樣,但呢個擔心係多餘,原來上到台會有驚喜,佢把聲喺女仔入面算係低音,可以咁有特色,最近仲扮嘢,佢原來可以做到咁多嘢,收收埋埋好多技能,我係十分支持佢,佢每round比賽都有問我,大家交流比賽心得,佢嘅進步真係好大。」
![Ben有妹妹任助手,幫手整理衣服。 Ben有妹妹任助手,幫手整理衣服。](https://image.hkhl.hk/f/1024p0/0x0/lr/sthl/6d34d158a6d58bd7f8eee12754314a1f/2024-08/0c28df5b-a3e0-49ea-bfe4-b6ab28dbbaf3.jpg)
![Maggie早前參加《福祿壽訓練學院 》,扮莫文蔚獲讚。 Maggie早前參加《福祿壽訓練學院 》,扮莫文蔚獲讚。](https://image.hkhl.hk/f/1024p0/0x0/lr/sthl/db33168d815fd5ef8e7c182981a9dbc7/2024-08/06_2_5.jpg)
![Ben(右一)跟Maggie(右二)齊出席活動,可惜仲未有機會同台演出。 Ben(右一)跟Maggie(右二)齊出席活動,可惜仲未有機會同台演出。](https://image.hkhl.hk/f/1024p0/0x0/lr/sthl/920d2cbfee1c3dc93fbe3768b7404f1a/2024-08/02_2_2.jpg)
Ben有計劃跟妹妹合作,「有諗過現場表演,我可以幫佢伴舞。」他們亦想過合唱,甚至MV都拍埋,但覺得未夠靚,「淨係喺屋企拍,都係拍好啲先,我哋不斷喺屋企練歌,幫對方和音,我哋把聲襯到都幾好玩。 」原來他一家人一向都愛唱歌,「可能畀媽咪影響,媽咪鍾意唱粵曲。」他更負責陪媽咪唱,「我會唱任劍輝,背就背唔到,如果有得跟住歌詞都可以唱晒成首。」有聚會時,他還負責跳舞助興,「本來我唔會,但係我媽咪會叫我跳吓,個氣氛就會開心啲。」新年時幾兄弟姐妹還會有特別賀年節目,「我哋新年會整啲賀年歌拍畀媽咪睇。」
![Ben笑言由細到大都愛周身郁,經常會表演唱歌跳舞。 Ben笑言由細到大都愛周身郁,經常會表演唱歌跳舞。](https://image.hkhl.hk/f/1024p0/0x0/lr/sthl/25fe85df6d3ea4b11d109e272ca9d3e9/2024-08/01_2_9.jpg)
>>>立即瀏覽【移民百答】欄目:新移民抵埗攻略,老華僑也未必知道的事,移民、工作、居住、食玩買、交通、報稅、銀行、福利、生育、教育。
>>>即讀【新移民專欄】:新移民第一身經驗,與你分享當下年輕移民生活日常大小事,即讀「新移民專欄」。
iPhone:https://apple.co/2IBi812
Android:https://bit.ly/2Pe8anu
>>>訂閱【加拿大星島網電郵快訊】,每天可收到最快新聞資訊電郵:
https://www.singtao.ca/subscribe/singtao.php
>>>立即關注加拿大星島新聞網TG Channel,讓加國新聞無遺漏全天候向你推送:
https://t.me/singtaoca
>>>訂閱CCUE YouTube 頻道,查看更多吃喝玩樂、生活資訊影片。