《男航女机师》SLDPK丨头条戏场

全片110分钟，笑咗90分钟，当中包含小笑、大笑、翻笑同埋笑到系咁拍朋友只手，香港好多导演都话拍笑片好难，但韩国啲笑片真系好癫，好笑之余，笑料仲要好高质，点做到？此片内容有关男人扮女人，易容玩足电影八成时间，即系咁，如果你觉得男扮女点可能呃到人?又或者睇亲戏都逻辑L上身，呢套戏未必啱你睇嘞。(刚上映) 撰文:廖思慧

韩正优扮女人考机师获取录，首日返工超有自信。

 

韩正优本是星级机长，有钱又有面，但衰多口被炒后一沉百踩。

 

电影属大癫级爆笑喜剧，由搞笑好叻的曹政奭主演，一直知佢劲，剧集、电影、舞台剧、音乐剧，唱埋OST之余，仲要有奖攞，真系瓣瓣掂。戏中饰演韩正优，本是深受市民追捧的明星机长，电影以他的受访片段作故事开首，然后因为衰多口由天堂跌落地狱，事业爱情两失意，衰开有条路，双失中佬更惨被航空界列入黑名单，身边的擦鞋仔全部走晒，更风水轮流转，要做“契弟”求帮忙，喜剧难得含警世意味。

老婆嗌离婚，工又冇埋，好彩韩正优仲有个仔。

 

收到成堆缴费通知书，韩正优把心一横扮女揾食。

 

韩正优个妹，韩正美真身，都系癫嘅，韩善伙做白卡妹真系一流。

 

唔好买嘢食入场
为了再揸飞机，韩正优决定富贵险中求，请求美妆KOL细妹韩正美(韩善伙饰)帮手，化靓妆兼装假胸再著返对高踭鞋，然后冒充妹妹应征机师竟顺利获取录，笑到黐线癫狂剧情就此展开，期间有大量危险位，会好惊“A货韩正美”因大意而穿煲，全程Keep住又惊险又好笑，买咗爆谷入场应该食唔到，要留意返。

“A货韩正美”着花裙仔出街，获叫靓女超兴奋。

 

“A货韩正美”开工要扮声又要举止斯文，经常徘徊穿煲之间，好好笑。

 

“A货韩正美”越做越受欢迎，步真身后尘做埋星级机师拍广告。

 

为了减轻佬味，曹政奭拍摄前努力减去15磅，加上天生有对纤瘦靓腿，著短裙真心好睇，狗公同事徐贤锡(申承浩饰)睇到发晒光，更因男扮女初期未熟习著裙礼仪而闹出好多笑话，狗公同事更误以为“A货韩正美”嘅所有大意走光都系刻意引诱佢，哈哈哈哈哈。最后要赞翻译，字幕抵死又贴地，有“脆”、“提子”及“大癫”等，同剧情劲夹，睇得好开心。

阿妹同阿哥嘅互动有好多地狱笑位。

 

“A货韩正美”嘅狗公同事徐贤锡，亦曾是韩正优的擦鞋仔。

 

“A货韩正美”嘅闺密尹瑟琪(李宙明饰)，同韩正优亦有过节。

 

 

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。