阿正首開棟篤笑興奮擺屋企人上枱 童年秒速背股票號碼技能終有用丨獨家

商台DJ阿正（黃正宜）自小已享受講嘢𠱁人開心，童年負責在家庭聚會表演超強記憶力，甚至連股票碼號都背埋，之後發現做DJ可以講嘢𠱁人開心仲有錢搵覺得超正，更以棟篤笑為夢想。熱烈恭賀首擔大旗舉行首個棟篤笑《正DIVA》的阿正，自言首做焦點「淆淆哋」的她，預告處女Talk騷會出賣屋企人，又會邀請《膠戰》戰友做嘉賓。採訪：杜杜 形象:Matthew Lee 髮型:Nick 化妝:Sarah Dai 服裝:3CE and Lalafox from i.t、Charles & Keith 場地:No.5 Studio

阿正慶幸《正DIVA》有林若寧做顧問，火火做導演，「個心就定好多。」但同時擔心票房，「啲人聽你節目唔代表會畀錢買飛。」

 

阿正着牛仔布晚裝行紅地毯影海報，喻意是個貼地的女主角。

 

阿正試過在不同媒介演出，但始終未能即時感受到觀眾的反應，「幾享受撩人玩，見對方好反應，會更加hyper，就好想試吓棟篤笑。」但她一直只敢FF，唔敢好似老友DJ Elsie（呂珮琳）主動向商台CEO陳靜嫻提出開騷，「我成日覺得自己未ready、未儲夠嘢，遲啲先嘅心態，雖然森美大哥成日同我講唔使諗，做咗先啦！」直到有日CEO拍佢膊頭，「出年開騷喎，準備吓啦。」

阿正初入電台便拍住森美工作，更經常獲鼓勵多方面嘗試。

 

超強記性幼稚園生

阿正之後在《叱咤》小試牛刀，從此返唔到轉頭，「平時做主持，都唔會上台講咁大段嘢，嗰次真係第1次喺Spotlight下，見到觀眾反應，同埋腎上腺素話畀我知，我係好enjoy，有癮啦！」棟篤笑命名《正DIVA》，因她好想真正做一次主角，「我定位比較似配角，係助攻角色，好少Spotlight長期喺自己度，雖然唔慣，但人一世物一世，點都想做次焦點，畀多啲自信自己，係好大膽挑戰，講真係淆淆哋。」

年初《叱咤》阿正小試牛刀，做了一段棟篤笑。

 

童年阿正已好享受講嘢𠱁人開心，更會經常在家庭眾會中，當着一班大人表演「絕技」，「細個記性好好，背嘢好叻，我記得好快，以前會喺親友面前背篇文出嚟。」她笑言有表演過朗誦，但唔似Edan（呂爵安），「冇佢咁搖晒頭囉！」除背文章，連記無意義的數目字亦有一手，「最經典試過背股票號碼，0008就係電訊盈科，因為姑媽畀咗個股票機我撳，我覺得好得意。」當時她只是幼稚園生，大人都驚訝她有此「絕技」，「我背啲正經嘢，佢哋會欣慰嘅笑，姨母笑，但係無端端背股票號碼，佢哋會覺得你搞咩呀？！」

阿正細個有表演朗誦，但強調唔似Edan搖晒頭。

 

阿正讀中學時，已經好有表演慾。

 

遺傳父母優良基因

阿正成為中學生，更加享受引人笑，「原來我有能力令你哋笑出聲喎！細個好enjoy呢個角色，讀書時更加勁，識咗班比我更黐線嘅friend，佢哋將我心入面隻野獸放埋出嚟，玩得好盡，喺嗰個氛圍下，變得開朗，鍾意見到大家開心。」變成「開朗正」的她發現DJ工作適合自己，「細個enjoy𠱁人開心，但唔會知道點樣轉化成事業，直至聽收音機，呢班人做咩咁好笑嘅，聽得好開心喎！先意識到令人快樂都可以係工作嚟，黐線㗎，邊會有咁筍嘅工㗎！覺得我幾啱做呢樣嘢，就想做DJ。」她亦成為棟篤笑粉絲，黃子華、林海峰、森美和卓韻芝等的棟篤笑全部睇晒，但自問跟他們級數差距太大，「前輩歷練比較多，講嘢會大膽啲、宏觀啲，我講啲小情小愛同生活瑣事。」

自小恨做DJ的阿正，入職首日影低工作證紀念。

 

身為棟篤笑粉絲的阿正，當然唔會錯過林海峰的Talk Show。

 

棟篤笑話題少不免出賣自己，阿正亦唔例外，她預告更會出賣埋屋企人，「我阿爸阿媽實在太有趣嘞！」她認為鬼馬性格來自父母，「我阿媽啲基因對我功不可抺，都要多謝老竇，佢比較理性，令我冇直接走到瘋狂盡頭，有返少少理性，兩個基因喺度拉扯，令我變得更好，呢個騷想大家認識我，源頭一定由基因開始。細佬都好多嘢可以講，佢哋好fun。」因為《正DIVA》打算請嘉賓，她形容比較似綜藝騷，「有啲環節想搵埋《膠戰》佢哋一齊玩，應該會好開心。」但她擔心大家都忙，特別跟林明禎傳緋聞的Edan，「為港爭光嘛！佢自求多福，就算唔得閒表演，都冇穿冇爛咁嚟睇，不過我唔知留1張飛定2張飛畀佢嘞！Jeffrey（魏浚笙）𠵱家係世界級，一定會留2張飛畀佢，我好知定嘅。」

盡得父母優良基因的阿正，預告開騷會瘋狂出賣他們。

 

阿正笑言Edan忙同林明禎搞緋聞，未必有時間做嘉賓。

 

阿正相信搵《膠戰》戰友做嘉賓，一定會好玩。

 

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。