《不丹沒有槍》完美演繹「我全家都好幸福」丨頭條戲場

不丹電影雖然少見，但作品都好厲害，2022年Pawo Choyning Dorji執導的《不丹是教室》就入圍第94屆奧斯卡最佳國際影片，同導演的《不丹沒有槍》也進入今年奧斯卡最佳國際電影15強。後者講民主同投票，較講述教育的前者嚴肅百倍，不過唔使驚，牽涉政治的電影都唔一定血流成河講打講殺，導演繼續以喜劇的方式呈現，以黑色幽默帶出不丹首次民主化的有趣過程，因為對白好Mean，全程不斷被導演引到笑出聲。最重要觀影過程中會令你反思何謂「自由」及「幸福」，散場後內心難得平靜，唔該晒導演。(8月22日上映) 撰文:廖思慧
 

不丹曾被評為全球最幸福國家，風景真係靚到癲，睇戲已覺得心曠神怡。

 

電影背景為2006年，時任不丹國王晉美旺秋（Jigme Singye Wangchuck）決定退位，宣布將國家導向民主化，並將於2008年舉行首屆不丹國民議會選舉，人民對突如其來的「民主」搲晒頭，覺得好哋哋點解要轉？更擔心國王是否病了。

不丹作為全球最後開放電視及網路的國家，人民好單純，生活簡單。

 

「投票都要教？」
選舉成為大新聞，日播夜播，正在閉關靜修的喇嘛聽到廣播即吩咐徒弟，必須於大選之日前要搵到一支槍，同時間，全片最重要角色，一位美國槍械收藏家到訪不丹，得知國王為教市民投票大搞「模擬大選」非常疑惑，「投票都要教？」觀眾透過美國人的視角去了解不丹人民的天真無邪，會心微笑位非常多，美國人以為「有錢使得鬼推磨」，對無慾無求的人就最難收買，最後，佢同心儀古董槍擦身而過，但能帶走不丹巨型吉祥物，更無啦啦累積了功德，害我笑得好大聲。

不丹人帶美國人去搵老人搵槍，後者口頭承諾將槍以超平價賣畀美國人。

 

徒弟又係搵槍，老人得知喇嘛要槍，錢都唔收送畀對方。

 

美國人想用錢收買徒弟(右)支槍，徒弟唔需要錢，收買唔到，完全顛覆三觀。

 

最過癮模擬選舉中，官員要國民在代表工業發展的「紅黨」、代表自由與平等的「藍黨」及代表保護環境的「黃黨」中投選最鍾意的黨派，還教各派助選團互相指責爭取選票，有老人家諗唔通，覺得投票啫，「點解要教我鬧人？互相攻擊？」而大部份人民亦覺得活在幸福中，唔好搞咁多嘢啦，「民主自由」唔係個個都想要，荒謬又好笑。

選委會安排法會跟模擬投票同時舉行，貪多人參與。

 

徒弟周圍搵槍，好多人話冇，但更多人問？「槍係咩嚟㗎？」最終成功搵到。

 

 

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。