《失控遊戲夜》成套戲冇個正常人丨頭條戲場

Netflix 出品的電影質素一向超級極度參差，中伏度極高，加上戲名改得差，會令人冇意欲撳入去睇，但我就最鍾意抽盲盒，即係鍾意玩驚喜，見到德國片《失控遊戲夜》有比利時末日劇《絕夜逢生》的靚仔Dennis Mojen，加上好有型嘅女主角Janina Uhse，故事內容都幾過癮，富貴女主角邀請新男友參加有錢小學雞老友遊戲之夜，期間至尊小學雞前男友不請自來，搞到場面失晒控，有喊聲、有鸚鵡叫聲、有嘔吐聲，同埋大量鬧交聲，總之好嘈。撰文:廖思慧   圖片提供:NETFLIX 
 

左係新歡，右係舊愛，中間係有型女主Janina Uhse。

 

唔知點解玩Game要玩到剝晒衫，但我好歡喜。

 

男主Dennis Mojen身形好正，呢幕可以不斷重睇。

 

睇預告同故事簡介，以為《失控遊戲夜》類似電影《今晚玩救你》，後者成班朋友圍埋玩Game，然後精心佈局神秘謀殺Party，仲請埋老臨扮黑社會同警察，越玩越喪。好明顯我諗多咗，你只要照字面解《失控遊戲夜》就係故事核心，即係失控加遊戲夜。

因為狗狗，男女主一見鍾情。

 

玩Game前要做啲儀式，好隆重其事。

 

一班古怪朋友，個個都有心病。

 

套戲攝時間一流
Netflix將電影歸類為機智風趣、滑稽、喜劇片，冇錯嘅，電影的確有以上元素，有啲位仲過份滑稽㖭。男主角隻狗公因為唔覺意喺公園誤擒女主角隻狗女，兩人一見鍾情繼而熱戀，電影開場冇5分鐘已經有床戲。女主每個月都會有個「良朋歡聚玩Game夜」，熱戀情侶一秒都唔想分開，男主跟女友到達朋友間黐鬼線巨大獨立屋，未正式玩Game，開單車舖的男主已開始力敵女友甲乙丙丁小學雞有錢老友，「我男友都係做老闆，開單車舖。」全場靜過太空。

女主的夫妻老友住嘅大屋，亦係玩Game地點。

 

玩board game期間最多笑料，因為成班有錢人都唔正常，個個諗嘢諗埋一邊，中後期女主前男友加入，原來最黐線係佢。

男主老友(左)忠告男主，去有錢人屋企好易出事。

 

睇戲重點，男女主角最緊要靚。

 

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。