【曾智华专栏】非我杯茶，离场饮茶

睇电影，我有无穷热爱，但却非每类片皆入场，部分有先天抗拒也。例如政治主旋律电影、古装片（中外皆如是）、卡通动画、Cult片⋯⋯及真人演出的漫画英雄片，例如Marvel一类。冇乜对与错，或品味高与低，总之就不是我杯茶，勉强入场也会中途拜拜。

早几日又试一次，中到应。近两周冇乜戏想睇，因多数是动画，本地制作亦冇新戏，只有上开的继续上。上网查每条线放映的，密密麻麻皆《死侍与狼人》，唔睇就冇戏睇。

心谂院商永冇死错人，若套戏唔得，点会排到咁密？美国开画即收到嘭嘭声，全球走势也如是，好，又入戏院睇睇点解咁劲？

一开场竟声明三级，唔够十八岁请离场，否则⋯⋯吓！乜英雄片会是三级？

五分钟之后完全明白，粗口满天飞，你杀我，我斩你，鲜血及肢体满天飞（包括头颅也如是）。咦，与我想像中大义凛然正气到爆的传统美国英雄，完全不同，点解会咁？

更离奇，此片属廿一世纪霍士之作，而迪士尼则收购咗佢，咁⋯⋯咪与“迪记”卖开的传统优质文化及形象大冲突？点解咁都得？后来才知，原来正气英雄变粗口佬烂挞挞加血肉横飞好收得。

小弟睇的是全声版，成间戏院嘈到飞起，椅也会震，非常劲，不过⋯⋯真系唔知点解，如此吵闹又刺激到爆的电影，竟带我见睡魔，十五分钟后沉沉入睡（睇早场冇理由攰的呢），半小时后冻醒，MOKO戏院为乜似雪房？

当机立断，既非自己杯茶，立即起身走人，改去叹广东茶。落商场二楼“小皇府”，叫齐虾饺肠粉牛肉棉花鸡，再嚟碗及第粥，身体才慢慢变暖，舒服晒。下次再听见Marvel，就咪再搞阿叔啦。

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。