【曾智華專欄】非我杯茶，離場飲茶

睇電影，我有無窮熱愛，但卻非每類片皆入場，部分有先天抗拒也。例如政治主旋律電影、古裝片（中外皆如是）、卡通動畫、Cult片⋯⋯及真人演出的漫畫英雄片，例如Marvel一類。冇乜對與錯，或品味高與低，總之就不是我杯茶，勉強入場也會中途拜拜。

早幾日又試一次，中到應。近兩周冇乜戲想睇，因多數是動畫，本地製作亦冇新戲，只有上開的繼續上。上網查每條線放映的，密密麻麻皆《死侍與狼人》，唔睇就冇戲睇。

心諗院商永冇死錯人，若套戲唔得，點會排到咁密？美國開畫即收到嘭嘭聲，全球走勢也如是，好，又入戲院睇睇點解咁勁？

一開場竟聲明三級，唔夠十八歲請離場，否則⋯⋯吓！乜英雄片會是三級？

五分鐘之後完全明白，粗口滿天飛，你殺我，我斬你，鮮血及肢體滿天飛（包括頭顱也如是）。咦，與我想像中大義凜然正氣到爆的傳統美國英雄，完全不同，點解會咁？

更離奇，此片屬廿一世紀霍士之作，而迪士尼則收購咗佢，咁⋯⋯咪與「迪記」賣開的傳統優質文化及形象大衝突？點解咁都得？後來才知，原來正氣英雄變粗口佬爛撻撻加血肉橫飛好收得。

小弟睇的是全聲版，成間戲院嘈到飛起，椅也會震，非常勁，不過⋯⋯真係唔知點解，如此吵鬧又刺激到爆的電影，竟帶我見睡魔，十五分鐘後沉沉入睡（睇早場冇理由攰的呢），半小時後凍醒，MOKO戲院為乜似雪房？

當機立斷，既非自己杯茶，立即起身走人，改去歎廣東茶。落商場二樓「小皇府」，叫齊蝦餃腸粉牛肉棉花雞，再嚟碗及第粥，身體才慢慢變暖，舒服晒。下次再聽見Marvel，就咪再搞阿叔啦。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。