【曾智華專欄】專業操守，極刑紅線

國泰航空一名二副機師，在澳洲未能通過酒精呼氣測試，航班被逼延遲，涉事機師即時暫停職務，可能炒魷！

任何專業，皆有不可踰越的道德及操守底線，一過界必「殺無赦」。點解？因某啲致命範圍，錯一次已足造成大災難，故公司管理層必須讓所有員工知道紅線在哪。

這條紅線，根本毋須日日講，而應是早已「植入」員工血液，變成自動波一部分，想都唔會想嘗試超越。

例如外科醫生，每次手術前，必先再三將手消毒又消毒，點解？因絕不容許有任何細菌存在，以防危害病人的生命。

這個洗手動作使唔使人提？百分之一千應是一種「體內文化」，個個會「自動波」做，絕對不可能出現「唔記得洗」這種「死刑級的錯」。

機師又如何？例如國泰，經常爆滿，即每班機有幾百條人命在你手，所以，機組人員尤其機師，絕對不可受酒精或藥物影響，公司嚴格規定飛行前十小時內，絕不可碰酒精。

今次國泰機師出事，早早退咗休的航空公司前管理層大佬C一聽到，立即成個彈起，喝問：「成何體統？紀律何在？」

幸而今次只是個新仔機師出事，若是資深的師傅級機師，則肯定對公司文化及專業操守造成極大影響，因會令後輩有樣學樣⋯⋯阿頭都得啦⋯⋯

C哥指：「機師乃非常嚴謹的專業工作，強調極高紀律與道德。在任何時間，包括工業行動時，也絕不可影響航班正常安全運作，因這是死罪的紅線！」

究竟今次國泰機師未能通過酒精測試，是偶發性個人問題（也可能要殺無赦作示範表演嘞），又或是開始有紀律鬆散現象，必須搞清搞楚！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。