【曾智華專欄】誰買醫保最重錘

強制性醫保近年在中產階層，已是一個幾乎必買的「產品」。無他，當你見過公立醫院的「災難性情況」，除非「無路可逃」，否則，一定不想經歷。

多年來，我呢代上一輩比較貧困，也沒有買醫保的常識（提供的也相對少），故此，睇醫生可能到私家，但一入院，多到公院。

小弟數十年來不停出入公立醫院探親人、朋友，次次皺眉，因病房之內不但病床貼病床，連走廊也放滿臨時床，病人呼叫（救？）之聲此起彼落，醫護及助理個個忙到一頭煙，根本無可能一一回應（勿說細心照顧了）。就此，病人要換片的冇人換、抹身的冇人抹⋯⋯

情況有冇可能改善？冇！起碼可見將來，只會在人手短缺下繼續惡化。

面對這種磨人的死局，誰會願意「捱」？一係死頂唔入醫院，一係貴貴都要幫襯私家。

以前入私家醫院，尤其「富豪」級的，仿似是黑洞，出院時才知被「斬」幾深。

幸而近年醫療保險日漸普及，加上花樣甚多，有保基本的，也有乜都保的，任君選擇。

昨晚與大國手Y醫生晚飯，多口問佢：「你有冇買醫療保險？（當然有！）買邊種？」

佢灌啖法國極級紅酒，細細聲答：「最貴全包的一種！二十四小時私家看護頭等房！」

Y醫生一如所有醫生，艱苦捱過香港大學醫學院後，先到病房做實習醫生，再慢慢升，經歷幾十年公家醫院慘況，知之甚詳，早已向自己許諾——永不接受這種地獄式苦難。

咁點？努力工作，努力積累財富，然後買最貴的醫療保險，以便一旦出事，又或要走最後一段路時，得到最佳照顧。另外，身為大國手，重病時維持最基本自尊也重要。

「碌Sir，我的想法做法，同行中極普遍㗎！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。