【曾智華專欄】新豬肉應收「垃圾馬」

馬季結束，老友安排下，與某華籍練馬師晚飯閒談，當然趁機問一些長期埋在心中的問題，增長知識又好，八卦也好。

問：點睇新來的練馬師？點才可企穩？

答：初來埗到，一定要先有馬，未建立關係，唯有乜馬都收。個別外來練馬師極揀擇，一睇不停減分又或五班貨色，即不願收。其實儍儍哋，你新嚟，最緊要有馬贏，有表現，之後馬主自然畀馬你。佢哋睇馬，以為不停減分及五班就是垃圾，其實不少已減到就快贏得，正是行運醫生醫病尾也。

問：點解某一兩個華人牌仔咁慘，冇乜馬騎？點解你哋華籍練馬師唔畀機會自己人？

答：決定畀邊個騎，權力並非全在我哋手，都要聽馬主意見，畢竟馬係佢哋嘅。個個馬主都望贏，當然唔想誤於庸手啦。個別騎師冇馬騎，原因全喺佢哋身上。若果你騎得又態度專業，就算一兩個練馬師針對你，仍會有二十個馬房睇你噃。若個個都唔畀馬你騎，一定係你問題。可能騎功差，可能水準飄忽，可能唔聽策騎指示，也可能成日跑錯。

問：點解湯普新騎功麻麻，但大把馬騎？

答：態度非常好又勤力。畀隻馬佢騎，事先做足功課，查馬背景，不但在港上陣戰績，連到港前每場表現都向練馬師報告，老實，覺得佢主動到有點煩。

問：騎師間中被抽秤，邊個最擅長解畫？

答：昔日的戴勝最犀利，每次都有一個完美劇本，令監場董事冇佢符。另有個別蠱惑騎師，若在某一場有「特別表現」，事先必定預埋被問話，會早早作定故仔點解釋。這方面當然老江湖者著數晒，牌仔英文又唔好，「功課」又冇做，當然大大蝕底。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。