【曾智華專欄】必須打殘的捐贈者

今日標題是否有點奇怪？因「捐贈」通常涉及無償慈善行為，例如捐血、捐器官、捐書、捐食物、捐衣服、捐款⋯⋯以至捐精。

本來是的，但可惜是所有以上的範圍雖然充滿「天使」，但也可能有少量「魔鬼」。

近日上畫的電影冇乜心儀，尤其暑假大量動畫片，更非小弟杯茶。咁點？易，揸個遙控上Netflix亂撳。

通常會先睇最受歡迎的。咦，四十年前令票房爆炸的《妙探出差》竟出新片，收視冠軍喎，睇睇先。真真珠玉在前，今天的愛迪梅菲雖仍過癮，但相比以前⋯⋯加上橋段熟口熟面，睇咗二十分鐘即決定收工。

改撳去睇大明星，一度是女神級的妮歌潔曼新作《阿媽戀上我波士》（《A Family Affair》），雖然收視也爆燈，但睇見妮歌的膠口膠面，令幻想破滅，冇晒癮，又係二十分鐘收工。

再撳呀撳，咦⋯⋯有套片名極吸睛——《千子之父：捐精狂奇案》（《The Man With 1000 Kids》），聲明真人真事紀錄片，只三集。好，又試吓睇睇。

一睇就似被磁石吸住，追呀追，追足三集（也只兩個多小時），知道答案才暫停休息。

劇集講述一個白種荷蘭音樂人，2007年開始遊走世界不停捐精，濫捐之下造出大量後代。捐精，國際標準是每人不可越過二十五次，因太多會造成近親繁殖的惡果，但從來冇法律真正視捐得太多屬犯法，執法者也沒有甚麼法例去禁止。於是這個捐精狂就在十多年不停在歐洲、亞洲及非洲「播種」，等於散布千千萬萬個未來危機。

惡行曝光後，「母親」們怒不可遏，想辦法誓將此惡行停止，但可以點做呢？說來，呢類亂捐精，也是一項幾十億美元「產業」，更有潛伏性改變人類種族及膚色陰謀，看之令人握腕！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。