【曾智華專欄】開個實驗網台爆硬

一個人平時懶威懶醒，自然多人睇你幾時瘀，一旦發生，當然蜂擁窒到你飛起啦！

小弟講邊個？正是我自己，抵死㗎。上周二在本欄公布畀肥女B窒，因成日信埋啲無謂廣告，試吓呢，試吓咾，每次花費幾百蚊，次次都得個桔，正牌福頭。

最近又見網上有隻護膚膏狂谷廣告，話有去老癦神效，見二百幾蚊（平時的多一百幾十蚊），撲去連鎖藥房店買囉。結果，撲咗N次都食白果，顯示除廣告效力宏大之外，肯定N咁多長者老友面上出斑斑，個個都想搞掂佢。

好啦，終於買到，回家日日搽呀搽，兩周之後，有冇效果？零！顯示又被老點！

所以，畀肥女B窒「咁都信」？冇得駁。不止，專欄刊出後，大量「幸災樂禍」等我瘀的各路生張熟李，開心到爆：「你丁友，平日扮晒英明神武，咪又係街邊阿叔一個，廣告話乜你信乜！」

眾多回應的，有一位專做網上頻道老友「叻仔R」，靈光一閃，約見面：「碌Sir，傾傾佢，我有個意念，必爆，正是由你及肥女B唱雙簧，開個水魚實驗台，好似消委會咁，買晒各類產品真人親試，然後做第一身報告，睇睇水魚率有幾高。」

R仔並非講笑，見面時手機下載咗N段廣告，包括宣稱：抗衰老、減肥、禿頭脫髮、排毒、壯陽、治夜尿、消除神經痛、降血壓尿酸、舒筋活絡、補腦長壽、去斑去皺、治三高⋯⋯

嘩，唔睇唔知，原來坊間有咁多「神效」產品，全部三兩百蚊，食唔壞人，冇效亦冇人會走去投訴的「補充劑」。

你叫我乜都試完踢爆人？咁即打爛人飯碗之餘，連傳媒行家廣告收入都倒米啫，好乞人憎喎。

其實「補充劑」根本在賣感覺良好，我無謂乜都吞、乜都試去人肉測試嘞。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。