聲夢三小花自覺演出80分 炎明熹低調進場與樂易玲前後坐零交流 Yumi直言不滿DSE成績
聲夢三小花姚焯菲（Chantel）、鍾柔美（Yumi）和詹天文（Windy）昨晚（20日）在旺角麥花臣場館舉行《音樂出沒：Let’s play together 演唱會》尾場，事前已講明會來睇騷的炎明熹亦戴著cap帽低調現身，而樂易玲、冼靖峰、林智樂及薛家燕亦有來捧場。早前疑似用「忘本論」暗串炎明熹的樂小姐被安排跟對方坐前後行，但兩人就沒交流。
Chantel、Yumi及Windy甫開場即跳唱《失憶周末》炒熱氣氛，三人一輪跳唱及Solo後，Yumi坦言有少少攰，之後三人講到18歲生日願望，已18歲的Windy笑言是植髪，現在也完成了，Chantel就話想跟小菲象一起慶祝生日，不過九月未必可以達成，而Yumi則表示鍾意坐車，想18歲後可以自己駕車遊車河。
三人隨後又跳唱多首經典快歌，包括《跳舞街》、《H2O》、《Chotto等等》及《今期流行》等，而Chantel、Yumi及Windy在演唱會中亦有表演彈琴，吹色士風及吹長笛，之後Windy在encore時合唱《給自己的信》一度感觸落淚。演唱會尾聲，她們表示從出道到現在經歷很多，也要感謝所有關注她們的人，沒有大家的支持，很難行到這𥚃，看到台下每位星夢學員，亦想起很多不同回憶，而她們最後更表示：「最重要多謝樂小姐！」三人最後合唱《CYA》後完場，坐足全場的炎明熹離開會場時就表示：「好睇，睇得開心！」
完騷後三人一同受訪，她們對今晚表現給予80分，她們指今次排練的時間很趕，因Chantel回港也比較遲，提到Chantel甩舞步，她們就解釋有些舞步沒有特定，所以不算甩，又指已盡力，最重要是享受就足夠，問到難忘位？Windy表示唱《到此為止》及《給自己的信》，因為就好像自己的心聲，《到此為止》更像回到最初的時候，所以唱的時候心情很感慨及感動：「《給自己的信》嗰時我喊咗，因為我見到台下好多唔同手燈，大家喺度揮，我諗起《聲夢》一開始個演唱會都喺度舉辦，覺得大家都長大咗唔少。」
提到炎明熹來捧場，她們指很感動，更透露對方有去後台叫她們加油：「又話好掛住我哋，我哋仲笑佢身上有陣香氣，原來佢特登買咗新衫著住嚟捧場。（台上冇提佢！）因為因為rundown好密，所以用「聲夢」統稱。」至於何時會跟炎明熹「合體」，Chantel表示要等公司安排，又謂對方在學業或工作上應該也很忙碌，不過大家私下也有保持聯絡。（完騷聚吓？）希望有時間，不過我仲有個零禮拜就走。」Yumi就表示希望在Chantel離港前，能一起拍新歌MV。
剛考完DSE的Windy指9月將會跟Yumi升大學，但自己仍未知道是否會離港讀書：「唔知日後大家會唔會喺唔同嘅地方，今次我哋三個開演唱會，仲見埋Gigi真係好珍惜。」不過Yumi就直言不滿放榜成績，所以有點不開心：「呢幾日都喺度諗緊條路應該點行。（讀唔到想讀嘅科目？）可以咁講，我對自己都好高要求，面前好似好多選擇，要再深思熟慮。（留喺香港讀？）係，要慢慢安排。」Chantel指兩人放榜亦令她心情變緊張，又透露回紐西蘭後便要考試，故9月未能返港慶祝生日，要到12月才能返港。
>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。
iPhone：https://apple.co/2IBi812
Android：https://bit.ly/2Pe8anu
>>>訂閱【加拿大星島網電郵快訊】，每天可收到最快新聞資訊電郵：
https://www.singtao.ca/subscribe/singtao.php
>>>立即關注加拿大星島新聞網TG Channel，讓加國新聞無遺漏全天候向你推送：
https://t.me/singtaoca
>>>訂閱CCUE YouTube 頻道，查看更多吃喝玩樂、生活資訊影片。
