【曾智华专栏】最后一战劲刺激

上周日相信十万计马迷必似小弟一样，过了极度兴奋又刺激的一天。真真是峰回路转，无论你支持伍鹏志或吕健威夺冠军练马师，心情都似跳上了过山车。

赛前本栏大字标题《终极一战买硬吕健威》，我当然想佢最后胜出，兼且自己亦真金白银投下重注。

结果由第二场开始到第五场，冇瘾到失魂，因“肥仔志”赢吓一场，赢吓又一场，将“师傅威”抛离三场W。

最顶住道气，多口老友高佬M，跑完第五场来电：“肥碌，你啲山埃贴士又输到读者瞓街喇，哈哈哈，仲有，你成日唱改坏马名冇得赢，唔该睇睇只‘初恋’，人人知凡初恋，九成钉钉冇结果，点知呢只入直路已Easy Win㖞！我等住替你收尸喇！”

岂有此理，横死掂死，第七场开始，再重锤吕健威，场场夹叠上，睇睇最终系高佬M死定我死！

唔跑落去都唔知边个笑到最后！真神奇，由第七场开始，吕健威“遥遥领先”、“襌胜辉煌”、“包装天将”W过三关，追平伍鹏志，此时相信高佬M已知衰，唔敢再来信息猛窒。果然，今次我同佢收尸嘞，因威哥再赢埋“手机表霸”，最后以七十场W杀低徒弟“肥仔志”，而我亦执唔少。

当日潘顿风骚到爆，扫下六W，冠军练马师大战，两个练马师都要靠晒佢。

不过一单还一单，马迷仍唔会选“软硬鞭”为最受欢迎骑师，因佢冇品，被马会竞赛小组研讯，立即玩反面，唔出席冠军人马颁奖礼外，更于“猎宝勤”被抽秤未尽全力研讯时，寸寸贡，被小组指“行为及操守低于标准”。

别人就发财立品，佢就赢尽马而冇品！

“猎宝勤”咁跑法，马会竟放生佢，此决定已成马迷心目中的一项耻辱。

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。