【曾智華專欄】最後一戰勁刺激

上周日相信十萬計馬迷必似小弟一樣，過了極度興奮又刺激的一天。真真是峰迴路轉，無論你支持伍鵬志或呂健威奪冠軍練馬師，心情都似跳上了過山車。

賽前本欄大字標題《終極一戰買硬呂健威》，我當然想佢最後勝出，兼且自己亦真金白銀投下重注。

結果由第二場開始到第五場，冇癮到失魂，因「肥仔志」贏吓一場，贏吓又一場，將「師傅威」拋離三場W。

最頂住道氣，多口老友高佬M，跑完第五場來電：「肥碌，你啲山埃貼士又輸到讀者瞓街喇，哈哈哈，仲有，你成日唱改壞馬名冇得贏，唔該睇睇隻『初戀』，人人知凡初戀，九成釘釘冇結果，點知呢隻入直路已Easy Win喎！我等住替你收屍喇！」

豈有此理，橫死掂死，第七場開始，再重錘呂健威，場場夾疊上，睇睇最終係高佬M死定我死！

唔跑落去都唔知邊個笑到最後！真神奇，由第七場開始，呂健威「遙遙領先」、「襌勝輝煌」、「包裝天將」W過三關，追平伍鵬志，此時相信高佬M已知衰，唔敢再來信息猛窒。果然，今次我同佢收屍嘞，因威哥再贏埋「手機錶霸」，最後以七十場W殺低徒弟「肥仔志」，而我亦執唔少。

當日潘頓風騷到爆，掃下六W，冠軍練馬師大戰，兩個練馬師都要靠晒佢。

不過一單還一單，馬迷仍唔會選「軟硬鞭」為最受歡迎騎師，因佢冇品，被馬會競賽小組研訊，立即玩反面，唔出席冠軍人馬頒獎禮外，更於「獵寶勤」被抽秤未盡全力研訊時，寸寸貢，被小組指「行為及操守低於標準」。

別人就發財立品，佢就贏盡馬而冇品！

「獵寶勤」咁跑法，馬會竟放生佢，此決定已成馬迷心目中的一項恥辱。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。