【曾智華專欄】若果得，仲使幾千蚊⋯…

人漸老，身體當然出現這樣那樣的變化。長者人人有分、永不落空的是筋骨問題，腰痠腳軟軟、坐骨神經痛、五十肩、腕管炎⋯⋯

另外，「日子有功」，手手腳腳甚至面部出現啡斑老癦。

以上的一切並非甚麼致命病，更不會太難頂，故此，一般人都不會立即去睇醫生，因診金次次千千聲冇走雞。

咁點？忍囉！除非真真頂唔順，例如坐骨神經痛到冇覺好瞓，否則，捱得一日就一日。

呢呢，這就令好多「乜乜物物產品」應運而生。基於不是藥物，故此不受監管，變相可以賣廣告促銷。於是網上布滿可以幫你解決任何生理問題，例如脫髮、肥胖、不舉、便秘、神經痛⋯⋯甚至去斑的商品。部分重錘請明星做代言人：「嗱，好掂㗎，我都有用㗎！」

呢類商品定價往往只是三幾百蚊（因太貴患者寧願睇醫生），剛剛引到消費者心諗：「反正平平哋，不如試吓，可能得呢！」

人同此心，心同此理，小弟也是普通人，也有這種心態，間中就禁不住買吓呢樣、買吓嗰樣試試，三幾百元，唔得就掉咗佢。

例如去年坐骨神經痛時，見到網上有隻「乜乜痛」，揚言「一樽搞掂晒」，三百八十八蚊送上門。好，試試。食完一樽，零效果，終於死死氣去搵骨科推拿聖手「真人發功」才搞掂。

上個月又中！因面上長期有幾處啡斑，唔多好睇，哈，又喺網上見到廣告話有隻護膚霜「一樽搞掂」，令啡斑消失。好，又買樽試試。

同肥女兒講，即畀佢窒：「肥爸，若三兩百蚊樽膏有如此神奇效力，班靚太仲使花幾千蚊去激光打斑？咁你都信？」

結果點？當然畀肥女兒一箸夾中，二百幾蚊樽潤膚膏，潤膚當然冇問題，能去斑？發夢冇咁早！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。