【曾智華專欄】終極一戰買硬呂健威

馬季煞科，只得一個焦點，一個話題，正是誰會登上冠軍練馬師寶座。二選一，呂健威或伍鵬志？

假若冠軍平頭，就要計亞軍，我睇呂健威一定過頭嘞。

呢次決戰，我仍會買威哥贏，因兩人終極一戰布局，伍廄似乎已去到山窮水盡，冇馬可用，牌面只得「美麗第一」有機會W，另外「堅闖」只能博博吓，其他幾匹完全冇冠軍相。

呂廄又如何？擺明傾巢而出，用盡一兵一卒搵命博，當中有幾匹可以問鼎冠軍，包括：

一、「禪勝輝煌」。今季演出非常穩定，在不停進步中，由季初五十七分編入第四班開始，又W又Q，殺下五W兩Q，真的是戰績輝煌，目前已升至第一班，九十七分，但未見停步。今次更刻意改配潘頓，目標超明顯，兩個字——要贏。唯一考慮，今季已跑咗十二場，能否頂埋呢鋪？

二、「龍之輝」。千二米明星，今季出五場，三W一Q一第四，絕對專家。近兩次贏，潘頓按韁過終點，分別大勝兩個幾及六個幾馬位，賠率只得一點四及一點五倍，顯示根本冇得輸。今次再跑千二米，熱熱都要食，兼且要食硬！

三、「包裝天將」。上場新馬插四班跑快活谷千二米，潘頓臨尾一騎即彈離兩個幾馬位贏，根本未知仍有幾多在手。呂健威為爭冠軍，將馬轉跑沙田。上場W完評磅員加十分，即係⋯⋯有排贏呀！

四、「手機錶霸」。又一明日之星，今季五十二分起步，出九場，三W三Q三P，準到飛起，布文霸住騎，今次又座P望Q或W，冇走雞！

五、「遙遙領先」。潛質非凡，5月才開始上陣，出三次，兩Q一P，下個目標肯定是W，今場應該到位！

呂廄五匹大惡馬晒冷，問你伍鵬志點闖關！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。