【曾智華專欄】野雞大學

香港大學經管學院早前被揭有內地生以假學歷入學，新聞公布當日，剛剛與一位大學教授飯聚，我肯定地話：「呢單只是冰山一角，必定越爆越多！」

點解會咁？其實國際學術圈內早早人盡皆知，不少大學，包括名牌的，近年皆水乾。點搞？正正要以收碩士生來吸水。

基於形勢上要靠佢哋「提供養分」，故此，自然傾向收生時寬鬆一點，隻眼開，隻眼閉。

我也試過被不同大學系主任聯絡：「Luke，可否幫幫忙，出任我哋學院『著名舊生』，接受校刊訪問，再作收生宣傳？」

連我呢類二打六畢業生也攞嚟宣傳，大家可知形勢幾咁惡劣。　　

搞到此地步，乃因學系自負盈虧，你冇學生，就等於冇收入，冇收入，教授、講師邊有工開？就咁簡單。

所以，假學歷並非新鮮事，最少在半世紀前小弟在美國讀大學時，已是「眾所周知」。總之，冇人舉報的話，大學也不會非常認真去查。因一查，可能涉及行騙，手尾麻煩。同時又少咗一個「客仔」，尤其美國三四線大學及「野雞大學」，多一個非本土學生，就多一份收入也。

說來，野雞大學這個詞，已多年冇人用了，但在美國及台灣仍存在不少。

「野雞大學」正式名稱是「文憑工廠」（Diploma Mill），泛指不受任何官方機構承認的大專學校，可以是純虛假，可以是扮上課，可以是賣文憑，也可以包裝成「遙距課程」，不用實體上課就可畢業，取得文憑。

香港所有大學，當然不是「野雞大學」，但同樣相當「水緊」，故才出現疏漏，被不法中介分子乘虛而入，我就唔信各大學收生處負責人未聽過嘞。只是今次通晒天，想唔「做嘢」都唔得啦，少大筆收入都要執返正喇。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。