【曾智華專欄】權威妹妹仔醫生

好多人誤會，以為公務員睇公院，有另一條隊，以前可能係，如今？冇！故此小弟定期覆診眼科、精神科及心臟科，全與市民大眾一齊輪，絕冇優先！

早前坐骨神經痛，心臟科醫生寫轉介信去登記，死得，新症排到2028年，痛死未天光。點搞？一係衝急症室（當然不能濫用），一係睇私家囉，次次千千聲，這就是現實。

又例如年紀大，當然有白內障，既非急症要做手術，當然排隊尾。剛剛公布，公院白內障有十五萬新症，最長要輪十五個月。頂唔順？又係請重錘點到私家醫院做囉。

小弟右眼2015年中風，算急症，才勉強可以提早排到眼科打特效藥，之後再定期覆診。

不過，若覆診期未到而你眼有事，也是要去睇私家。上月某朝起床，右眼滿布紅絲，一睇就知爆血管，速速就醫。

醫生詳細左右眼睇勻，拋下幾句：「曾先生，你左眼有青光眼跡象，下次到公院覆診，記得通知醫生詳細檢查。」點解要等公院覆診才檢查？因若即在私家診所做眼底掃描，又可能花幾千大元也。

終於昨朝覆診期到，晨早走去眼科醫院趁墟（例必人山人海），次次準備搞三四個鐘。

攞籌後，遂樣做：一、驗視力；二、驗眼壓；三、滴藥水放大瞳孔。之後坐一小時，待藥力發作，然後等嗌名。

等足個多小時，揚聲器傳來：「曾智華，142號房。」

推門入，二十歲出頭妹妹仔醫生忙到癲，機械人式快速操作，我見面即報告：「醫生，早前私家醫生話我左眼可能青光，請你跟跟！」佢立即翻查電腦紀錄：「你去年做過眼底掃描，冇事，放心，記住控制好膽固醇血壓水平，走得，八個月後見！」

權威口吻與其外形毫不匹配。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。