【星爺講波 27】四強火併：英格蘭勝在人腳經驗 荷蘭攻強守弱有破綻

周三( 10日)：英格蘭 Vs 荷蘭 (加東時間下午3:00)

歐國盃明日上演另外一場四強大戰，由上屆亞軍英格蘭火併橙衣軍團荷蘭，勝方可以在星期日跟西班牙或法國爭奪歐洲王者寶座。

兩軍晉級過程都帶幸運成分，而運氣除咗反映喺場內，亦反映在走線。同處下線嘅英荷，避開咗另一條線嘅勁旅，包括世界排名第二嘅法國、攻力最強嘅東道主德國、最有冠軍相嘅西班牙，另外仲有比利時、葡萄牙兩支歐洲一線球隊，間接提高殺入四強或決賽嘅機會。

英格蘭今屆由一開始至四強，過程一直充滿爭議聲。雖然小組賽順利以首名資格出線，但1勝2和嘅成績，以及臨場表現明顯唔及預期，特別係最後一場同斯洛文尼亞互交白卷，引發國內球評家、名宿和球迷嘅瘋狂指摘。即使到淘汰賽階段，教練修夫基多番變陣都未見明顯改善，連續兩場波都係先失守，如果唔係比寧咸完場前嘅世界波，以及沙卡功架十足嘅妙射，英軍早就執包袱回國。

荷蘭亦唔好得幾多，小組賽1勝1和1負得4分，僅以最佳第三名嘅資格晉級。到16強先至叫做有啲起色，3-0大勝羅馬尼亞，但八強面對土耳其亦都係先失一球，最後靠個烏龍波至反勝2-1晉級，得以20年來首次殺入歐國盃四強。

講番兩隊今場形勢，如果計表現，星爺覺得5場入9球嘅荷蘭稍為佔優，估計教練朗奴高文繼續採用效果不俗且靈活嘅4-2-3-1陣式，進攻方面，施蒙斯策動攻勢及掩護前方嘅迪比和左路嘅加普，而尼敦阿基應該會續任左後衛，而中場華亞文估計取代雷恩達斯或謝迪舒賀頓嘅位置。

至於英格蘭，後防喺對瑞士一仗用嘅三中堅陣式唔見太大效果，但傷癒嘅勞基梳爾後備上陣，令左路攻守變得平衡，應會復任正選，另即使干沙上場表現出色，由於馬克古希停賽一場後可以復出，佢都應該係修夫基首選。前線隊長哈利卡尼狀態雖然未達最高水平，但有穩定軍心作用，不宜輕易放棄。星爺覺得英隊要過關，殺著肯定係沙卡，希望修夫基唔好再浪費佢嘅才華，亂點鴛鴦，繼續安排沙卡踢佢最耍家嘅右翼位。

星爺預測英格蘭同荷蘭百二分鐘難分高下，互射十二碼後，幸運之神會選擇荷蘭，英格蘭緣盡四強。

AI預測：

英格蘭 Vs 荷蘭 (下午3:00)

預測賽果：英格蘭勝

半場比分：英格蘭1-1 荷蘭

全場比分：英格蘭2-1 荷蘭

總入球數：3球

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。