【曾智華專欄】大番薯起步維艱

冇得唔服！本欄在去年底透露，馬圈某高人直指有隻貴價馬改壞名，怕且好難Win，當時是12月。

邊隻？正是當時黎昭昇馬房的「喜報圍家」。

「碌Sir，好邪㗎。三種馬好難贏：一、馬名低俗難登大雅之堂；二、極端含意或與政治有關；三、諧音有點大吉利是，屢試不爽。例如早年的『的確近』（Danelaw）真係『釘囉』，得個近字，未Win過。又例如『祇是激』，真係激死馬主與馬迷！呢隻『喜報圍家』，一聽就是『起步維艱』，點Win？」

冇得唔服，結果隻馬上季輸足十一場，馬主畀養馬費畀到眼凸（黎廄著名貴）。到今季再輸九場，由三班六十五分撻到變五班三十四分後，想唔拉倉都難啦，改去賀賢馬房。

睇落飛，幕後肯定輸到眼坦坦，咁嘅馬有四場打到得五倍。至今已出賽二十三場，仲有冇機會贏呢？你話嘞。

另一新馬個名也過癮，名「大番薯」，究竟馬主知否大番薯含意係乜？

結果亮相第一場，果然跑到成隻大番薯款，一入直路腳軟，最後二百米幾乎收停。

其實現役馬有三隻也是改壞名。一隻是「整蠱專家」，出三次三次冇影，真大整蠱。第二隻是「洛河」，與「落河」諧音，又係一出釘釘，輸八個半馬位，不知競賽為何物。仲有一隻「加飯」，上輩經常講：「冇餸食飽飯。」不停「加飯」，即係⋯⋯結果隻馬跑足十二次，仍在「加緊飯」，服未？

今晚專攻研究第八場三班一千米，牌面三隻高晒，即「嘉應喝彩」、「年少多好」及「紅逸舍」，邊隻贏都冇得分㗎嘞。

論鬥志，當然是伍廄「嘉應喝彩」，今季位置王，出九次一W三Q三P，準到不得了，做膽可也。冷冷哋拖一票「大老撾」啦，上次初出沙田一千米第四名，今次渡江，必冷，可能試出彩虹！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。