【星爺講波 20】最後八強：批評英軍陰霾不散 修夫基受壓考EQ

士氣呢家嘢真係好神奇嘅，尤其係足球比賽，士氣高昂，弱隊可以有超水準演出，土氣低落，話之你粒粒皆星、鑽石陣容，一樣可以踢到走晒樣，焦頭爛額⋯⋯

在十六強賽，「雙斯」——斯洛伐克和斯洛文尼亞就率先示範弱隊點樣可以打高一皮波。兩隊同樣在被睇淡情況下歷史性小組晉級，士氣達到超高點，先係斯洛伐克對住上屆亞軍英格蘭大部分時間都領先，如果唔係比寧咸補時最後一分鐘忽然從天而降射入世界波，斯洛伐克就完成歷史創舉。之後再有斯洛文尼亞百二分鐘力拒葡萄牙來犯，最後只係互射12碼輸波，絕對係光榮出局。

至於演譯士氣低落後遺症嘅最佳球隊，首推捧盃大熱門英格蘭，佢哋士氣差以致表現差嘅主要原因，並唔係輸波係「內訌」。所指嘅內訌唔係將帥或球員之間不和，而係一眾英國球評家和名宿對佢哋表現嘅口誅筆伐。

英格蘭小組賽和丹麥，賽後就備受國內輿論抨擊，之後一場就同黑馬斯洛文尼亞互交白卷。而雖然小組1勝2和順利攞首名出線，但一眾「自己友」繼續狂插，最終教練修夫基、隊長簡尼先後開腔隔空反擊，句句有骨，火藥味甚濃，咁嘅情況下，英軍士氣直插谷底。

風水佬呃你十年八年，星爺賽前嘅預測立竿見影，十六強對斯洛伐克，徇眾要求派出上仗後備上陣演出頗佳嘅新星高比馬恩奴代替干拿加歷查正選上場，但結果同樣未如人意，全隊踢得幻得幻失，星爺覺得連修夫基呢位沙場老將都亂晒籠，最佳證明係沙卡打足三個位置(右翼、左閘、右翼衛），如果無比寧咸(下圖)做救世主，英軍已經提早返歸。

一如星爺睇緊英格蘭落後斯洛伐克時同老友吹水時所料，即使英軍追和甚至反勝晉級，修夫基同麾下球員肯定繼續受靶，B B C三劍俠(連尼加、舒利亞、米卡李察士)輪流發炮，一炮比一炮猛，茅頭直指修夫基！

連尼加：「我看到的這支球隊就像迷失的靈魂，他們似乎不知道自己在做什麼，也不知道球隊應該怎麼踢⋯⋯英格蘭在對陣瑞士的比賽中 明顯是贏波次選⋯⋯他們大多數人都不喜歡這種風格，我有點同情球員們。」

舒利亞：「一定是戰術的問題，一定是指令的問題，因為球員們的踢法與他們習慣的踢法不同⋯⋯ (對斯洛伐克的表現)糟糕得不真實。」

米卡李察士：「我們想做什麼？我不知道修夫基發出了什麼信息，實在令人擔憂。」

連前英格蘭國腳梅菲也加一腳，指隊長簡尼表現水準以下，暗示修夫基要想想「換人」。

儘管修夫基回應有改善空間，球員也繼續護主護隊友，接二連三的猛烈批評，星爺好難相信士氣無進一步受打擊。

其實星爺對於塘邊鶴指指點點好反感，搵得人揸弗就要信任人，況且修夫基有彪炳往績支持，絕對係有能者，寄語修夫基揸住宗旨做人，貫徹自己嘅足球理念，唔好畀外界騷擾，左搖右擺只會令球員無所適從，越踢越差！即使失敗，起碼對得住自己對得住球員。

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。