【曾智華專欄】你疲？好多馬迷未疲噃

有句老話，凡到馬季尾，不少馬評人呻——人馬皆疲。

馬季唞暑當然有其歷史背景及文化，但純客觀討論，今時今日馬季是否必須唞暑呢？

馬會高層也曾研究過「全年跑」。

人馬皆疲這形容詞，套入與賽馬相關的人物，例如馬會職員、馬房工作人員、馬迷、馬經傳媒、相關零售⋯⋯有不同反應。事實，不少人靠賽馬提供「精神食糧」，也有部分提供收入，故此，是「馬停口停」。

跑馬，關乎人及馬。若人手足夠，當然可以似一般行業，全年無休運作。唔夠馬就入多啲馬。人更如是，若有足夠練馬師、騎師及馬房工作人員，輪更替換，怎會有問題？

再者，「從化賽馬」必定殺到，到時必會需要更多人手，此乃長遠部署也。

季末選馬王及最受歡迎騎師選舉，兩皆毫無高潮，因絕無懸念。馬王必定是「浪漫勇士」。「金鎗六十」當然要退位，此乃永恆真理——一代新人（馬）換舊人（馬）。奇在「金鎗六十」幕後仍未決定讓此馬退役，簡直難為這匹英雄馬。巨星馬如所有巨星，不懂在最適當時引退，眷戀點點虛榮，最終必定表現滑落，再被市場遺棄，何苦呢？

至於「最受歡迎騎師」，我維持睇法——取消。因監粗選任何一個，皆不會實至名歸，只會畀看台噓爆，又係嘞——何苦呢！

講講今日賽事，伍廄出十匹，呂廄出十二匹，又係搏命格局！

第六場第二班千四米伍廄冇馬，呂廄出兩隻，「傑出漢子」及「巴閉哥」，前者位置王，今季狂跑，出十三次，一W四Q五P，必須尊重，但不似W！「巴閉哥」此程高手，今場機會一半半！

我會以「潮州精神」拖以上兩匹，今季專攻千四米，非常準！今場大樹遮蔭，加上好分，做膽！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。