【曾智華專欄】高鐵點解唔安排好？

中國的高鐵，實在是一項驕傲成就，安穩、快捷、準時，兼且車站多在市中心，令旅客大大節省長途跋涉往機場的費用及時間。

還有是路線四通八達，回想三十年前的中國，點可能幻想會有這種「犀利」集體運輸系統出現？不過，每次我坐完，仍深深不忿，就是為乜要「搞成咁」？點解唔做多一步，令高鐵可以在外人面前多添一份成就感？

我講乜？正是講每次坐高鐵，尤其在內地，有種「走難」的感覺。

首先，個個站人山人海，每班車停站，只約五分鐘，你趕到入閘，上唔到車就死火，真係急到人都癲，分分鐘心臟病發。

基於閘口不多，故流水作業式，你不可預先排，好嘞，到你班車入閘時，就出現「中國式」問題，即前推後擁，不少更詐儍扮懵一於打尖，你鬧佢，佢面皮一呎咁厚，當你唱歌。

此時，根本無人維持秩序，恍如「話知你班友混亂至死啦」咁態度。

另外，更奇為無論你畀幾多錢坐商務位或一等位，都冇任何跟付出費用相符的安排，總之就是全部人一齊「走難」。

更令小弟覺得不安，為點解成個高鐵運輸安排，冇考慮長者及行動不便者需要？咁「走難」法趕頭趕命，點解唔安排特別通道協助行動不便者？難明又反智！

其實高鐵在其他安排方面，做得相當好，例如在一般公眾或私人地方（包括五星酒店），總有人大模斯樣吸煙。但高鐵？一個都唔敢！

小弟更發現一個犀利安排，點解高鐵可以贏飛機，正是佢不單止唔使入油，更勁，沿途不停在清潔，不似飛機泊停才做。

由此，一列高鐵可以用到一百巴仙咁盡。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。