【星爺講波 19】十六強大戰：荷蘭發力羅馬尼亞有排震 黑馬奧地利可破土耳其

周二(2日)：羅馬尼亞 Vs 荷蘭(加東時間中午12:00)、奧地利 Vs 土耳其 (加東時間下午3:00)

來到第四日亦都係最後一日嘅十六強大戰，照樣上演兩場，頭場羅馬尼亞對荷蘭，尾場奧地利對土耳其，比賽結束後八強全部產生，決戰形勢會更明朗。

先講羅馬尼亞對荷蘭，羅馬尼亞在結局出人意表的E組中奪得首名出線資格，荷蘭則在飽吃驚風散下以D組第三名出線。

歐國盃歷史上首次出現小組4隊三仗同分，需要以得失球差和得球多少來決定名次，羅軍結果以較佳得球壓倒比利時得E組首名。但唔知好運抑或唔好運，荷蘭喺D組最後一場負奧地利，最後僅憑第三名資格晉級，羅馬尼亞就陰差陽錯下喺16強即刻對住整體表現不俗嘅橙衣軍團，過關難度不減反升！

觀乎近績，羅馬尼亞強差人意，最近七場比賽中只贏一場(小組賽贏烏克蘭)，而荷蘭對上7戰3勝，狀態明顯較佳，尤其輸奧地利一場都有2球進帳，火力在列強中數一數二，羅馬尼亞後防肯定受嚴峻考驗；加上荷蘭在過去13次與羅馬尼亞交鋒中僅輸過一次(2008年歐國盃外圍賽輸0-1），星爺睇好橙衣軍團可延續佳績，法定時間擊敗羅馬尼亞，順利入八強。

至於尾場奧地利對土耳其，黑馬奧地利越戰越勇，D組最後一場技術擊倒88年歐國盃盟主荷蘭，一舉搶埋呢組首名出線，表現令人刮目相看。星爺睇好奧地利，唔單止因為佢哋係小組一哥，佢哋近年狀態之佳，最近19場比賽取得14勝3和2負嘅彪炳成績，係歐洲狀態最好嘅幾友球隊之一。

值得一提係奧地呢14場勝仗之中，包括三個月前友誼賽以6-1擊敗今場對手土耳其！但喺正式比賽中，土耳其則在最近五次對陣奧地利都保持不敗，而且每次都沒冇失波，隱隱存在格食格味道！

雖然星爺睇好奧地利氣勢如虹可以90分鐘內解決土耳其，但土耳其大軍係今屆小組賽正選人腳中第二年輕球隊，體力和拚勁同全場積極迫搶嘅奧地利有得「揮」，星爺估計奧地利會有一番苦戰至可以晉級。

AI預測：

羅馬尼亞 Vs 荷蘭 (中午12:00)

預測賽果：荷蘭勝

半場比分：羅馬尼亞 0-1 荷蘭

全場比分：羅馬尼亞 1- 2 荷蘭

總入球數：3球

奧地利 Vs 土耳其 (下午3:00)

預測賽果：打和

半場比分：奧地利 0-0 土耳其

全場比分：奧地利 1- 1 土耳其

總入球數：2球

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。