【星爺講波 18】十六強大戰：法國比利時翻版世盃四強戰 葡萄牙遇斯洛文尼亞有暗湧

周一(7月1日)：法國 Vs 比利時(加東時間中午12:00)、葡萄牙 Vs 斯洛文尼亞 (加東時間下午3:00)

2024歐國盃16強淘汰賽明天上演第三天比賽，頭場係法國對比利時，勝方將與尾場葡萄牙對斯洛文尼亞嘅勝方在8強戰會師。

法國對比利時呢一場係2018年世界盃準決賽嘅翻版，上次法國1-0小勝，仇人見面，到底比利時能唔能夠報番一箭之仇，抑或法國再贏一次？

法國和比利時可謂難兄難弟，佢哋至目前為止嘅表現未見世界排名第二和三嘅霸氣，小組法軍1勝2和，屈居奧地利之後得次名出線，比利時仲驚險，小組4隊同分，靠得失球差至攞番個第二名出線席位。

雖然係咁，法國喺小組賽中僅失一球，防守記錄之佳僅次於保持清白之身嘅西班牙，亦都係最近五場比賽中唯一失球。而比利時嘅近況其實都唔錯，過去18場各項賽事中只輸一場，即係小組首仗負斯洛伐克。

計對賽往績，法國隊在過去一個世紀中與比利時交手75次，26勝19和30負，比利時略佔優勢，但近兩次碰頭，法國都係一球小勝，明顯法國近況較好。但到咗淘汰賽，臨場發揮和布陣比往績更重要，雙方實力其實半斤八両，反而星爺覺得法國有小小跌watt，比利時則有啲復甦，今場我睇好比利時復仇成功，法定時間和波，加時贏波晉級。

葡斯隨時射十二碼分勝負

至於尾場葡斯大戰，葡萄牙最後一場小組賽淨吞格魯吉亞兩隻光蛋，有人話係因為佢哋穩奪出線資格，教練馬天尼斯收起B費南迪斯、魯賓戴亞斯、貝拿度施華和老將比比等多名正選球員所致。但呢支2016歐國盃盟主，因為一支歐洲三流球隊而結束連續12場正式比賽勝利紀錄，多少會打擊球隊士氣。

如果大家信數據，葡萄牙自2008年歐國盃以來從未在正式比賽中連續兩場輸波；加上在小組賽階段，計算控球率、面對射門次數、射門次數，只有德國比佢哋優勝，足證葡軍攻守兼備。但有趣嘅係，數據又說明，葡萄牙自2016年捧歐國盃之後，喺歐國盃或世界盃淘汰賽階段嘅四場比賽中輸咗三場，記憶猶新係2022年世界盃，對手係最後殺入四強嘅黑馬摩洛哥，而今場對手又正是今屆比賽黑馬之一嘅斯洛文尼亞，係咪有啲暗湧？

斯洛文尼亞雖然首次殺入大賽嘅淘汰賽階段，但除咗今屆小組3戰未逢敗績，斯軍已經連續11場國際賽保持不敗(6勝5和)，可見要贏佢地都唔係容易。當然，整體實力比較，葡萄牙都係略勝一籌，星爺估計葡軍會陷入苦戰，法定時間和加時後都打和，要互射十二碼決勝負。

AI預測：

法國 Vs 比利時(中午12:00)

預測賽果：法國勝

半場比分：法國 1-1 0比利時

全場比分：法國 2-1 比利時

總入球數：3球

葡萄牙 Vs 斯洛文尼亞 (下午3:00)

預測賽果：葡萄牙勝

半場比分：葡萄牙 1-0 斯洛文尼亞

全場比分：葡萄牙 3-0 斯洛文尼亞

總入球數：3球

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。