【星爷讲波 16】十六强开波：瑞士状态佳意大利头痕 德国遇烂打丹麦陷苦战

周六(29日)：瑞士 Vs 意大利(加东时间中午12:00)、德国 Vs 丹麦 (加东时间下午3:00)

休息两日之后，欧洲国家杯明天嚟到第16日战火重燃，展开十六强淘汰赛，一场定生死，必定刺激无比。打头阵嘅第一日两场比赛，头场瑞士对意大利，尾场德国对丹麦。嚟到呢个阶段场场戏肉，星爷觉得有时间嘅话，每一场都唔应该错过。

星爷之前都讲过，入得欧国杯决赛周24强，条船点烂总有三斤钉，睇下赛前被认为系陪跑分子嘅斯洛伐克、格鲁吉亚、斯洛文尼亚和奥地利，都压倒几支欧洲中上游球队出线16强，特别系星爷爱队奥地利，更力压两届世界杯冠军法国得小组首名，昂然杀入16强。而入得16强，证明球队点都有番几道板斧，如果单以之前大赛往绩就咁睇低佢哋嘅能力，实在有啲武断，随时跌到一地眼镜碎。

星爷唔敢讲呢个阶段无大炒赛果，但淘汰赛玩法确系唔一样，既可以留前斗后，尾段发力等你无仇报；又可以同你斗韧力，守到完场，搏互射十二码分高下，总之一句讲晒，冷锋随时杀到，齐齐做个清醒嘅球迷！

讲番两场波，瑞士喺小组赛有令人印象深刻嘅表现，1胜2和保持不败，最后一轮如果唔系补时阶段失波就可以赢埋德国，攞埋A组首名添！原来连埋小组赛3场波，瑞士最近17场国际赛只输过一次，可见队波好fit，见到博彩公司将佢地对手上届盟主意大利列为赢波大热，而星爷又认为意军守强于攻，所以估佢地在90分钟法定时间打和，加时畀好气好力嘅瑞士赢波晋级。

至于另一场A组首名德国对C组次名丹麦，老实讲，星爷觉得主队德国除咗第一场大胜塞尔维亚表现较好，其余两场表现一般，最后一场仲差啲输埋，主场出击都踢成咁，完全无冠军相。不过今场对手系小组3场和晒嘅丹麦，逐个球员秤都系高小小，应该可以完胜对手，但丹麦球员以烂打见称，估计德国要苦战先至可以小胜出线。

AI预测：

瑞士 Vs 意大利 (中午12:00)

预测赛果：意大利胜

半场比分：瑞士 0-1 意大利

全场比分：瑞士 1-2 意大利

总入球数：3球

德国 Vs 丹麦 (下午3:00)

预测赛果：德国胜

半场比分：德国 1-0 丹麦

全场比分：德国 2- l 丹麦

总入球数：3球

T100

【2024年欧国杯期间，加拿大《星岛网》每日都会有驻场“球评人星爷”为大家开坛讲波，仲揾埋AI帮手预测赛果，人机强强联手，肯定“近”到无伦！】

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。