【星爺講波 16】十六強開波：瑞士狀態佳意大利頭痕 德國遇爛打丹麥陷苦戰

周六(29日)：瑞士 Vs 意大利(加東時間中午12:00)、德國 Vs 丹麥 (加東時間下午3:00)

休息兩日之後，歐洲國家盃明天嚟到第16日戰火重燃，展開十六強淘汰賽，一場定生死，必定刺激無比。打頭陣嘅第一日兩場比賽，頭場瑞士對意大利，尾場德國對丹麥。嚟到呢個階段場場戲肉，星爺覺得有時間嘅話，每一場都唔應該錯過。

星爺之前都講過，入得歐國盃決賽周24強，條船點爛總有三斤釘，睇下賽前被認為係陪跑分子嘅斯洛伐克、格魯吉亞、斯洛文尼亞和奧地利，都壓倒幾支歐洲中上游球隊出線16強，特別係星爺愛隊奧地利，更力壓兩屆世界盃冠軍法國得小組首名，昂然殺入16強。而入得16強，證明球隊點都有番幾道板斧，如果單以之前大賽往績就咁睇低佢哋嘅能力，實在有啲武斷，隨時跌到一地眼镜碎。

星爺唔敢講呢個階段無大炒賽果，但淘汰賽玩法確係唔一樣，既可以留前鬥後，尾段發力等你無仇報；又可以同你鬥韌力，守到完場，搏互射十二碼分高下，總之一句講晒，冷鋒隨時殺到，齊齊做個清醒嘅球迷！

講番兩場波，瑞士喺小組賽有令人印象深刻嘅表現，1勝2和保持不敗，最後一輪如果唔係補時階段失波就可以贏埋德國，攞埋A組首名添！原來連埋小組賽3場波，瑞士最近17場國際賽只輸過一次，可見隊波好fit，見到博彩公司將佢地對手上屆盟主意大利列為贏波大熱，而星爺又認為意軍守強於攻，所以估佢地在90分鐘法定時間打和，加時畀好氣好力嘅瑞士贏波晉級。

至於另一場A組首名德國對C組次名丹麥，老實講，星爺覺得主隊德國除咗第一場大勝塞爾維亞表現較好，其餘兩場表現一般，最後一場仲差啲輸埋，主場出擊都踢成咁，完全無冠軍相。不過今場對手係小組3場和晒嘅丹麥，逐個球員秤都係高小小，應該可以完勝對手，但丹麥球員以爛打見稱，估計德國要苦戰先至可以小勝出線。

AI預測：

瑞士 Vs 意大利 (中午12:00)

預測賽果：意大利勝

半場比分：瑞士 0-1 意大利

全場比分：瑞士 1-2 意大利

總入球數：3球

德國 Vs 丹麥 (下午3:00)

預測賽果：德國勝

半場比分：德國 1-0 丹麥

全場比分：德國 2- l 丹麥

總入球數：3球

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。