【星爷讲波 15】人机估波成功率计数AI:47%/星爷:69% 扒冷推介奥地利

西线连续第二日冇战事，休息埋明日，后日就会开始十六强捉对厮杀，进入淘汰赛戏肉，趁呢个空档，星爷同AI又同自己埋下单，睇下估波成绩如何？

比赛打咗13日，一共踢咗36场，AI估足36场，星爷估咗13场，如果只计胜、和、负嘅赛果，Al估中17场，成功率系47%，星爷则估中9场，成功率系69%。

老友问星爷，估波点解可以有近七成成功率咁高，特别系E组最后两场都咁勇估和波，4队全部得4分都畀我估到？

星爷问心𠮶句只系够运。当时我心谂，两轮比赛后4队同得3分，于是从几位教练嘅角度去思考，万一输波，而另外一场和波，登时就变包尾出局，连第三名晋级嘅些微希望都冇埋。所以，4队嘅策略上应该会倾向求和，因为和波的话起码仲有争第三名出线嘅机会，于是把心一横，反正都系搏下，于是估佢哋会翻版94美国世界杯小组赛成绩，结果大话夹好彩畀我估中！

其实星爷估波方程式好简单，除咗参考往绩，会倾向进取，支持弱势球队，好听啲讲就系钟意锄强扶弱，见到弱队有小小机会都会投佢地一票；讲真𠮶句系贪心搏大雾，因为冷门球队啲赔率通常唔错，尤其对住所谓大热门或世界排名前列球队，相当和味，即使输个心都觉得抵啲，如果投向热门球队，赔率低，万一输咗会份外觉得唔抵。

其实AI有接近五成嘅成功率，成绩都算系咁，始终佢多依数据行事，倾向热门都无可厚非。

后日16强开波，星爷会继续刨冷门，但淘汰赛一场定生死，未必好似小组赛咁多惊喜，所以星爷估波成功率有几多，个天至畀到答案。

但话时话，如果要星爷推介心水冷门，我会毫不犹豫叫大家留意奥地利和斯洛文尼亚，有睇开今届欧国杯嘅球迷应该心中有数，我尤其钟意奥地利，事关佢哋踢法，同星爷估波取向一样咁进取，我睇好佢地唔止16强咁简单，复制上届世界杯奇兵摩洛哥，杀入四强都唔系无可能！

T100

【2024年欧国杯期间，加拿大《星岛网》每日都会有驻场“球评人星爷”为大家开坛讲波，仲揾埋AI帮手预测赛果，人机强强联手，肯定“近”到无伦！】

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。