伍允龍唔敢直認筍盤：我唔係衰人嚟 憑「王九」彈起舊愛鍾嘉欣高調讚好男人丨獨家
《九龍城寨之圍城》成為香港史上第2部衝破1億票房電影，更有望登頂成為最賣座電影。戲中演大反派「王九」的伍允龍（Philip） ，亦人氣急升，特別是謝票時被「不講武德」觀眾偷襲後，高EQ回應獲勁讚有修養。原來Philip早年宣傳電影《惡戰》已遇過類似情況，在美國教功夫亦試過有人上門比試，甚至搞到要報警解決。46歲仍單身的Philip，談到舊愛鍾嘉欣公開力讚筍盤，他卻不敢直認只笑謂：「我唔係衰人嚟！」採訪：杜杜 攝影：羅安強 髮型:Calvin Yuk 化妝:Cosette Lee 服裝:I.T
視鄭保瑞導演為偶像的Philip，未知演「王九」有得見已開心，「佢以前拍《狗咬狗》嗰啲都睇晒，接到電話鄭保瑞想搵我傾偈已興奮，唔理佢叫我拍咩做咩，都會𦧲飯應，開咗3次會佢先至畀呢個角色我。」他最記得瑞導決定讓他演「王九」後的一番話，「佢同我講『你拍咗咁多年戲，伍允龍係邊個啲人都知，今次試吓唔同嘅嘢，做咗個造型後，觀眾未必認得你』，我都好鍾意導演咁樣去處理角色。」「王九」的招牌笑聲，瑞導早在他試造型時已構思，「佢叫我笑吓，試過要我再多啲，就搵到呢個啱嘅笑嘞！」不過他首日開工，仍未捉穩「王九」演法，直到第2日拍跟洪金寶去殺人戲，「嗰場戲cut咗，講我好興奮去揀啲武器去殺人，個笑容加強咗，好似去玩咁，見啲工作人員開始模仿個笑容同啲小動作，導演又好似幾鍾意，就知呢個方向係啱，真真正正搵到『王九』呢個角色。」
上門砌磋要報警解決
提到早前謝票時被「不講武德」觀眾偷襲，Philip坦承以往去外地宣傳時，都遇過類似場面，「我同安志杰演嘅電影《惡戰》，外地謝票有個情況好似，有個觀眾舉手想同我砌磋，司儀畀佢上台，有少少交流後，佢突然踢咗我一腳，跟住我話『好痛呀！承讓承讓！』，咁就解決咗個問題囉！」他認為做動作演員難免遇到這種「挑機」情況，要好小心處理，「淨係一個方法可以解決，就係保持冷靜，同埋判斷個情況需要做啲乜嘢。」Philip在父親伍紹華美國開設的「伍家國術會」任教時，經常遇到有人上門砌磋，「唔可以話踢館，係啲人好奇啲功夫係咪work，通常有咁情況都會派我出去。」但他強調只會點到即止，「去到個階段大家明白嗰個功夫就會停，了解咗我哋教嘅功夫係有效。」但試過父親未開武館，在其他武館任教時要報警解決，「有啲俄羅斯嘅武術家，都高大，嚟想嘗試吓我哋啲功夫，郁多咗有啲混亂，結果咪要報警囉！」
恨拍拖搵對象講緣份
46歲仍單身的Philip，一班《城寨》拍檔早前更為他公開招親，他坦承恨拍拖，「都想搵返個女朋友，甚至搵返個老婆，不過呢啲嘢可遇不可求，搵一個適合自己嘅人，自己又適合佢嘅人，互相適合都係要靠巧合。」提到擇偶條件，他直言：「最好就靚啦！」但重要都是緣份同感覺，「最緊要個女仔有愛心，錫我，大家了解同埋明白對方情況咁先可以夾到，所以要時間認識，不過要遇到先可以認識。以往拍拖同埋認識嘅女仔，都唔同類型，係感覺問題，有時要求某啲條件，但遇到個冇嗰啲條件。」談到舊愛鍾嘉欣以往少有提起他，最近出席公開活動卻忽然高調讚他，他大方話：「之前我哋有個歷史啲觀眾都知，咁啱佢出嚟做活動問係正常，我都好感激佢，好開心佢覺得套戲咁好睇，佢話覺得我做得OK係開心，始終都係朋友，任何朋友讚我都開心。」對於獲鍾嘉欣力證是筍盤，他笑言：「呢啲係人哋講，我唔敢話自己係唔係，我唔係衰人嚟！」
>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。
iPhone：https://apple.co/2IBi812
Android：https://bit.ly/2Pe8anu
>>>訂閱【加拿大星島網電郵快訊】，每天可收到最快新聞資訊電郵：
https://www.singtao.ca/subscribe/singtao.php
>>>立即關注加拿大星島新聞網TG Channel，讓加國新聞無遺漏全天候向你推送：
https://t.me/singtaoca
>>>訂閱CCUE YouTube 頻道，查看更多吃喝玩樂、生活資訊影片。
