【星爺講波 14】英軍首名修夫基照被圍插 反轉豬肚狂轟恐弄巧反拙

歐國盃明天西線無戰事，但係英國人就有好多事。雖然英格蘭順利出線，但批評英隊嘅聲音有增無減，統帥修夫基呢勻真係頭都大埋。

講到足球，英國人認真惡搞，除咗足球流氓嘅行為令人髮指，不少已更被列入黑名單禁入球場，球評家、名宿一樣好難服侍，稍為踢得差小小，即刻開咪開筆狂轟。

繼名宿連尼加、舒利亞日前開火，英格蘭完成分組賽並保住首名資格出線16強，以為可以耳根清靜番幾日，點知批評之聲陸續有嚟，最新加入「鬧名單」包括加利尼維爾和贊拿斯兩位前英格蘭國腳，前者指修夫基唔好再「嘥料」，浪費眾多天才球員，「阿歷山大阿諾特、彭馬、比寧咸、沙卡、馬恩奴、科頓——這些都是非常出色的天才球員，我們真的不能誤用這些天才，否則我們會非常後悔，修夫基也會。」

另一位前國腳，前熱刺名將贊拿斯也將茅頭直指英軍教頭說：「如果我們誠實一點，我們並沒有達到英格蘭球迷所期待的表現。我認為大多數球迷離開這個球場時，比起得到答案，他們有更多的疑問。」

熱刺教練波斯特科格魯接力開炮，直指修夫基隨時走寶，「作為教練，你的本工作是讓他們（年輕球員）逐漸適應，但偶爾會有年輕球員突然爆發，你就必須讓他們上場。我相信在12個月前，高比馬恩奴、亞當禾頓和高爾彭馬並不在修夫基前40名球員之列，但他們可能最終成為關鍵球員。」

網媒football planet插得更應：「修夫基是世界上唯一一位能夠讓德甲最佳射手、西甲賽季最佳球員和英超賽季最佳球員都變得完全無效的教練。」

星爺聽完咁多位專家插修夫基之後，某程度認同佢哋部分觀點，有錯要認打要企定，但都唔好反轉豬肚就係⋯⋯想起上屆英格蘭殺入決賽，全世界都捧到修夫基上天，依家表現差小小就鬧到不似人形，係咪現實咗啲呀。星爺勸大家冷靜啲，善意批評相信修夫基同一眾英軍隊戰將會比較容易接受，針鋒相對或者惡意攻擊只會令氣氛變僵，最終可能影響士氣和表現。

丹麥體育精神險勝得次名

昨天講開同分，即刻再多個實例同大家分享，就係C組第二、三嘅之爭。

有人問星爺，丹麥同斯洛文尼亞三場和波攞3分，大家嘅得球失球完全相同，點解最後係丹麥第二名直接出線，斯洛文尼亞只得第三名？翻查賽會紀錄，原來當兩隊同分同得失球嘅時候，首先會計雙方小組對壘結果，咁啱兩隊又係1-1平手，而下一個比併條件係「公平競賽」，而咁啱得咁橋，兩隊球員三場比賽之後各共領6面黃牌。最後關鍵落喺斯洛文尼亞助教Milivoje Novakovic身上，原來喺對丹麥呢場比賽嘅70分鐘，球證以欠體育精神而俾咗佢一面黃牌，結果丹麥就憑較佳嘅公平競賽表現攞咗次名直接出線資格。

有人再問星爺，如果斯洛文尼亞助教冇攞黃牌又點計。根據賽例，呢個情況會追溯佢哋外圍賽表現，咁啱兩隊又同處外圍賽F組，又係咁啱同得22分出線，但對賽成績丹麥兩回合贏3-2，最終都係丹麥佔優。

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。