【星爺講波 12】歐國盃分組賽開快車踢4場 C組英格蘭「內訌」 鬥斯洛文尼亞有隱憂

重點推介：C組 英格蘭 Vs 斯洛文尼亞：加東時間周二(25日)下午3:00

明天和後天係2024歐國盃分組賽最後兩日，賽會開快車，每日打兩組共四場波，同樣係同組四隊兩場比賽一齊開始，D組打頭陣，C組守尾門。

其實論出線變數，頭場D組會比C組大，事關除咗零分包尾嘅波蘭，暫列呢組頭三位嘅荷蘭(4分)、法國(4分)、奧地利(3分)只有1分差距，三隊都有機會直接首次名出線，但都有可能跌落第三位，尤其黑馬奧地利已見上力，隨時左右大局。

但星爺推介大家睇C組英格蘭對斯洛文尼亞一戰，除咗因為唔少人都好似我咁睇英國波大，論最有話題性嘅球隊，英格蘭肯定排第一。

上屆亞軍英格蘭陣中幾位主將，在各自嘅聯賽都有著火嘅表現，隊長簡尼甫加盟拜仁已成為神射手，比寧咸一樣在皇馬踢到識飛，分組首場更先拔頭籌，而曼城嘅科頓更在英超出盡風頭，攞埋最佳球員獎，加上後防定海神針獲加和大勇大熟嘅前鋒沙卡，咁嘅陣容同狀態，難怪賽前已被捧為奪標大熱門。

但星爺覺英軍開波後有貨不對辦既感覺，面對弱旅塞爾維亞只係1球小勝，到第二場情況冇改善，攻勢不到胃，防守又多甩漏，首場入球攻臣比寧咸大走樣，入波一球都只係簡尼門前執雞，比賽最後十分鐘仲被丹麥圍攻，差啲1分不保。連英格蘭名宿連尼加都忍唔住炮轟，惹來簡尼反擊，一時間英國陣營瀰漫「內訌」氣味。

英格蘭今場對手斯洛文尼亞，雖然球員名氣稍遜，前者世界排名第四，後者都只係五十七，但星爺翻查紀錄，連同兩場小組賽，斯軍已經連續十場國際賽保持不敗(6勝4和)，當中包括贏葡萄牙和丹麥，近況比英隊更好，上場對塞爾維亞都係最後一分鐘先至被追和，否則現在已同英格蘭一樣有4分。

英格蘭面對歐洲生力軍斯洛文尼亞，教練修夫基必須重建軍心，調整戰術和陣容，先做好中後場防守，加強反擊瓣數，否則隨時陰溝翻船，首名出線席位不保。

AI預測：

D組 荷蘭 Vs 奧地利 (中午12:00)

預測賽果：荷蘭勝

半場比分：荷蘭 1-0 奧地利

全場比分：荷蘭 2-1 奧地利

總入球數：3球

D組 法國 Vs 波蘭 (中午12::00)

預測賽果：法國勝

半場比分：法國 1-0 波蘭

全場比分：法國 2-0 波蘭

總入球數：2球

C組 英格蘭 Vs 斯洛文尼亞 (下午3:00)

預測賽果：英格蘭勝

半場比分：英格蘭 1-0 斯洛文尼亞

全場比分：英格蘭 2-1 斯洛文尼亞

總入球數：3球

C組 丹麥 Vs 塞爾維亞  (下午3:00)

預測賽果：丹麥勝

半場比分：丹麥 1-1 塞爾維亞

全場比分：丹麥 3-2 塞爾維亞

總入球數：5球

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。