【星爺講波 10】歐國盃分組賽最後一輪4隊一齊開波 A組瑞士對德國搏和求出線

重點推介：A組 瑞士 Vs 德國：加東時間周日(23日)下午3:00

歐洲國家盃踢埋今日就完成晒全部小組第二輪比賽，明日開始一連4天，同組4隊按賽例將會同一時間開波。明日嘅A組除咗德國提早出線和匈牙利提早出局，直接出線16強淘汰賽嘅次名席位，將是瑞士和蘇格蘭之爭。

瑞蘇兩隊明日分途出擊，前者硬撼主辦國德國，後者出戰零分嘅匈牙利，而形勢上當然是4分暫排次位嘅瑞士佔優，因為佢哋只要和波就完成任務，反觀僅得1分排第三位嘅蘇格蘭只係數字上仍有出線希望，因為除咗指望德國幫下手打敗瑞士，自己仲要大勝匈牙利四五球以上先可以避免出局，星爺認為機會相當渺茫，所以推介大家睇德瑞之戰，除咗因為係榜首大戰，其實形勢仲有小小微妙，如果德國一個唔覺意輸波，就會將首名出線資格送畀瑞士。

星爺覺得德國今場係絕對唔會因為已經穩奪出線資格而放水俾瑞士，事關如果佢哋失咗A組嘅首名資格，十六強就會對住B組嘅次名，即好大機會係西班牙或者意大利呢兩支傳統勁其中一隊，估計一向機關算盡走線嘅德國人，應該會決心保住首名資格，寧願對C組次名嘅英格蘭或者丹麥。

德國隊今場預計將繼續以控球為主，強調快速傳球和球員之間的靈活走位。統帥拿高士文可能會利用穆斯亞拿和科利安華迪斯的創造力，通過佢哋突破和傳球來打破對方防線。根度簡和甘美治將在中場控制節奏，而基斯富列治則提供攻防轉換的動力。防守方面，魯迪格和舒洛達碧克的中堅組合將提供堅實的防線，門將位置估計繼續重用老將紐亞。

至於再取1分便穩陣出線嘅瑞士，會強調防守和快速反擊，愈老愈可愛嘅沙基利嘅入球、傳球和創造力將是瑞士進攻的主要威脅。中場的格列沙加和費奧拿將負責攔截對方進攻並快速展開反擊。防守方面，文路爾艾簡治和尼高艾維迪將形成穩固的中路搭檔。

瑞士與德國最近一次交手係2020年10月嘅歐國聯，雖然雙方打成3:3，但過去7次交手，瑞士僅1勝，而德國則贏3次，睇嚟德國有格食格嘅優勢。星爺估計主隊會小勝1球。

AI預測：

A組 蘇格蘭 Vs 匈牙利 (下午3:00)

【星爺講波 10】歐國盃分組賽最後一輪4隊一齊開波  A組瑞士對德國搏和求出線預測賽果：蘇格蘭勝

半場比分：蘇格蘭 1-0 匈牙利

全場比分：蘇格蘭 2-1 匈牙利

總入球數：3球

A組 瑞士 Vs 德國 (下午3:00)

預測賽果：德國勝

半場比分：瑞士 0-1 德國

全場比分：瑞士 1-2德國

總入球數：3球

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。