【星爷讲波 09】欧国杯分组次轮最后一天 土耳其葡萄牙打甩髀 争首名避撼荷兰法国

重点推介：F组 土耳其Vs 葡萄牙：加东时间周六(22日)中午12:00

明日三场波，列强之中，如果讲形势最危急，可能系再输一场就随时要出局嘅前一哥比利时，但系讲到形势微妙、更加有睇头，星爷认为应该系土耳其对葡萄牙一场，因为两队有乜闪失只以次名出线，十六强淘汰赛随时即刻硬碰好大机会攞D组首名嘅荷兰或法国其中一队；加上C朗呢位六朝元老经常都成为话题人物，睇葡军出战多多少少梗会揾到惊喜！

两队喺首场比赛都攞咗3分，土耳其靠较佳嘅得失球差暂居榜首，葡萄牙居次，葡萄牙形势畀人弱，想反超前，睇嚟教练马天尼斯都要谂谂计。

但计近期表现，土耳其其实都几波动，上一场轻轻松松以3:1击败格鲁吉亚，但之前一场友谊赛意外输畀波兰1:2，表现令人大跌眼镜，面对2016年欧国杯盟主葡萄牙能否保持上场胜利嘅水准和气势实属疑问？

葡萄牙最近成绩都唔系好得去边，小组首场对捷克以2:1赢波，但开纪录一球系对方乌龙波，另一球由后备上阵嘅法兰斯高干斯卡奥补时射入，赢波带幸运成分。

土耳其同葡萄牙最近一次对阵喺2022年3月世界杯外围赛，葡萄牙以3:1获胜。而过去4次交手，葡萄牙赢咗3次，土耳其只赢1次，葡军明显占上风。

人脚方面，土耳其主教练“飞机仔”蒙迪拿手下有一班实力唔错嘅球员，门将有稳健嘅梅特古洛克，后卫有切历克、美列迪美罗和艾奇甸坐镇，中场则有查汉奴古、奥基约高斯鲁同奥简高古，前锋阵容包括艾度路高奴、古拿和耶斯斯等。

但葡萄牙阵容更鼎盛，迪奥高哥斯达继续把守最后一关，后防线有老路纵横嘅比比伙拍鲁宾戴亚斯、尼尔逊施美度，中场核心包括般奴费南迪斯、贝拿度施华和祖奥包连夏，前锋当然由C朗拿度挂帅，配合祖奥菲历斯、拉菲尔利亚奥等人攻坚。比人脚，葡萄牙胜一筹。

葡萄牙显示出强大嘅攻击力，土耳其需要保持防守稳定，估计佢哋会利用快速反击威胁葡萄牙嘅防线，而葡萄牙则需要发挥佢哋喺中场嘅控球优势，同时提高入球效率。星爷估计面对实力不俗嘅土耳其，葡萄牙会陷入苦战，但最终凭佢哋嘅球员质素可以小胜而回。

AI预测：

F组 格鲁吉亚 Vs 捷克 (上午9:00)

预测赛果：捷克胜

半场比分：格鲁吉亚 0-1 捷克

全场比分：格鲁吉亚 1-2 捷克

总入球数：3球

F组 土耳其Vs 葡萄牙 (中午12:00)

预测赛果：葡萄牙胜

半场比分：土耳其 0-0 葡萄牙

全场比分：土耳其 0-2 葡萄牙

总入球数：2球

E组 比利时 Vs 罗马尼亚 (下午3:00)

预测赛果：比利时胜

半场比分：比利时 1-0 罗马尼亚

全场比分：比利时 2- 1 罗马尼亚

总入球数：3球

T100

【2024年欧国杯期间，加拿大《星岛网》每日都会有驻场“球评人星爷”为大家开坛讲波，仲揾埋AI帮手预测赛果，人机强强联手，肯定“近”到无伦！】

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。