【曾智華專欄】入場、入場、入場

遇上精彩電影，當然齊齊入場欣賞，故此要大嗌三聲：各位快快入場、入場、入場。

講邊套？正是橫掃泰國及東南亞票房的《全職乖孫》。

初初上畫，有老友睇長者場後，來信息：「碌Sir，死啦，唔該快快發功，因我睇的一場只得五丁友。如此高質素又令人充滿共鳴的電影，千祈咪畀佢寂寂無聞就落畫啊。」

不過，轉頭又有另一位影迷老友來信息：「我上周末睇下午場，坐滿四分三，途中完全冇人去廁所，忍尿指數爆晒錶。到尾，開紙巾包及飲泣聲不絕，有靈性的人必被觸動。」

此片主角兩個，一位靚仔演員普提蓬，二十四歲，扮演廢青，一個無所事事打機青年，因見堂妹服侍臨終爺爺而獲得巨額遺產，剛眼見自己婆婆也是末期癌症病人，於是想扮嘢照顧一段短時期，博大筆遺產，從此日日打機，一世唔使做。

婆婆由從未演戲，但演技卻有影后級數的烏薩擔當，真人七十六歲，Fit晒角色，完全入戲，飾演一個傳統苦捱有紀律、保守，但將兩個仔縱壞的慈母，偏偏兩個仔唔生性，一個冷血只識炒股票，另一個則爛賭周身債。知道母親患末期癌症就快死，立即又吼住佢筆遺產，希望攞得幾多就幾多。

以上的故事，其實在華人社會中天天上演，小弟也見證不少。

此片導演柏特相當高手，講故事手法流暢，具說服力，劇情鋪排沒有刻意煽情，犀利。處理明仔由衰仔開始變誠心服侍婆婆的歷程，炮製得自然而然。

《全職乖孫》能橫掃東南亞票房，拍得非常出色之外，劇情細節中，有你有我，也有美好及醜陋的人性，再夾雜親情，看得上身上心。

入場、入場、入場。講完！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。