【星爺講波 08】荷蘭爭中場控制搶先機 法國三箭齊發謀定後動

重點推介：D組 荷蘭 Vs 法國：加東時間周五(21日)下午3:00

明日又有三場波，我諗識波嘅都唔使星爺推介，紮定馬睇D組荷蘭大戰法國！雙方首輪都攞咗3分，但荷蘭喺得失球差上稍為領先。呢場比賽嘅勝負可以決定小組出線嘅形勢，贏波一隊基本上穩奪首名出線席位。

首先，睇返荷蘭最近嘅狀態。佢哋首戰以2-1擊敗波蘭，入球功臣係加普、韋格賀斯，呢場勝仗完全符合賽前預測。荷蘭大軍可以話人強馬壯，教練朗奴高文有眾多好波之人可供調動。門將維貝魯根上場表現出色，多次瓦解波蘭嘅射門；後防線有雲迪積克、馬菲斯迪歷特和尼敦阿基嚴密鎭守，令中場雷恩達斯、華亞文和謝迪舒賀頓少了後顧之憂，可以盡情策動攻勢，前線迪比、加普勢必得到更多供應。

再睇法國嘅近況，佢哋最近友賽嘅表現尚算穩定，但小組首場未見王者霸氣，1-0小勝奧地利也全靠對手嘅烏龍球奠勝。但人腳之鼎盛比荷蘭有過之而無不及，尤其中前場粒粒皆星，曹亞文尼、尼高路簡迪助攻助守，前鋒線選擇更多，麥巴比、基奧特、基沙文、迪比利，個個都可以獨當一面。

兩隊對賽往績方面，法國近年明顯佔優。最近一次交手係2023年10月13號，法國以2-1擊敗荷蘭。喺過去10次交手中，法國贏咗7次，荷蘭只贏過2次，打和1次。從呢啲數據睇，法國喺對賽中有一定優勢。

至於呢場比賽嘅形勢，荷蘭同法國都需要爭取勝利以確保出線。荷蘭喺得失球差上稍為領先，估計佢哋會同法國國爭奪中場嘅控制權，再靠「前鋒孖寶」破關。法國方面，應該繼續利用麥巴比速度、基沙文嘅傳送、基奧特嘅身高發動進攻。唯一隱憂係麥巴比鼻骨受傷，可能要帶面具出場，或多或少會影響佢嘅表現。

總括嚟講，呢場比賽係一場實力接近嘅對決。雖然雙方都擁有強勁嘅攻擊力同穩固嘅防守，但關係到出線前景，踢法可能會比較小心翼翼，星爺估計打和嘅機會較大。

AI預測：

E組 斯洛伐克 vs 烏克蘭 (上午9:00)

預測賽果：和波

半場比分：斯洛伐克 0-0 烏克蘭

全場比分：斯洛伐克 1-1 烏克蘭

總入球數：2球

D組 波蘭 vs 奧地利 (中午12:00)

預測賽果：波蘭勝

半場比分：波蘭 1-0 奧地利

全場比分：波蘭 2-1 奧地利

總入球數：3球

D組 荷蘭 vs 法國 (下午3:00)

預測賽果：法國勝

半場比分：荷蘭 0-1 法國

全場比分：荷蘭 1-2 法國

總入球數：3球

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。