【曾智華專欄】邱禮濤罕見的佳作

今日標題，必定有人問：「喂，使唔使咁踩人呀？邱大導你都咁形容？即係話佢冇乜佳作啫，你識乜呀？」

在我評論電影字典中，從冇「撐」或「踩」呢類形容詞，因太膚淺。若你是長期讀者，必知小弟只按電影好壞作判斷。

邱禮濤是否大導演？絕對是！不但導演，兼且是電影製作全才，尤其攝影方面，早已是指導級，故佢所有執導作品皆有極高攝影水準。

此外，邱導演不少作品也有提名金像獎，最巴閉當然是1993年，出道冇幾耐，已能拍出《八仙飯店之人肉叉燒包》，將當時仍年輕的黃秋生捧成影帝。

之後邱禮濤不停「大量生產」，已執導超過八十套電影，水準有高有低。因著名「快靚正」，兼絕少超支或拖到天長地久埋唔到尾（不似某某大導，有開拍，冇拍完！），加上不少片極收得（近年的《掃毒2天地對決》及《拆彈專家
2》，替港產片橫掃內地市場），可說是位超級商業導演，投資者當然當佢神咁拜，大把戲任開。

不過，很可惜，至今邱禮濤的電影，一套也未能成為金像獎「最佳電影」，而佢自己拍足幾十年，也從未奪得「最佳導演」名銜，不免是個大遺憾。

點解一個如此多產、技法純熟、任何片種皆難唔到佢的導演，再加上有票房保證，會如此？

小弟作為「資深影迷」，認為佢仍未攞到最佳導演，是「公平」的。正是行家一出手，便知有沒有。金像獎，全部由資深電影行家投票選出，考慮應否獲獎，絕不單以票房作考慮，因為比票房更高層次的考慮，多的是。

不過，看來邱導演下年金像獎有機會了，因剛上映的《談判專家》水準極高，屬佢罕見頂級之作，明天繼續談。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。