【星爺講波 06】克羅地亞大叔經驗搭夠 阿爾巴尼亞偷雞「靠搶」

重點推介：B組 克羅地亞Vs阿爾巴尼亞：加東時間周三(19日) 上午9:00

歐國盃決賽周24支球隊全部亮過相，明日(周三)開始第二輪嘅廝殺，3場大戰中，從各隊首場表現及出線形勢嚟睇，星爺覺得B組克羅地亞對阿爾巴尼亞嘅比賽應該最有睇頭。兩支敗軍為咗唔想提早執包袱返歸，呢場幾乎係非勝不可！

克羅地亞第一場對陣西班牙嘅比賽淨吞3蛋，有人話佢地表現失準，但星爺覺得克軍係輸體能，尤其比賽後段明顯後勁不繼。教練達歷喺賽後亦提到，球隊必須提升能量，例如莫迪歷（下圖左）同高華錫兩位中場大叔到下半場中段就雙雙被換走，顯示出佢哋體力出現問題。不過，克羅地亞爛船都有三斤釘，有莫迪歷領軍，加上防守核心加華度爾，球隊喺技術同戰術上都具備優勢。

而阿爾巴尼亞方面，喺對陣意大利嘅比賽中，雖然最終輸1-2，但佢哋開場僅23秒就入咗球，創下了歐國盃最快入球紀錄，全場亦展現出咗頑強拼搏嘅精神。阿隊陣中有唔少好似中場格蘇拿踢法咁硬朗嘅球員，下下都埋身搶截，試圖令對手犯錯然後偷雞。

從雙方大軍名單睇，克羅地亞擁有較多經驗豐富嘅球員，特別係前鋒線上，有卡拉馬歷、比列錫呢兩把尖刀，而阿爾巴尼亞則比較依賴年輕球員如波查（下圖）。如果計以往對賽成績方面，克羅地亞(3勝1和1負）處於絕對優勢，但「波係圓嘅」，足球場上乜嘢都有可能發生。

克羅地亞今場應該會繼續用控球在腳戰術為主，同時依靠莫迪歷嘅球賽閱讀能力，創造射門機會。防守上，加華度爾同舒坦路會係關鍵，佢哋需要防範阿爾巴尼亞嘅快速反擊。

星爺預計阿爾巴尼亞會以防守反擊為主，通過中場嘅拼搶以快打慢，試圖尋找克羅地亞後防嘅漏洞，而波查將會係佢哋攻擊嘅主要武器，如果佢能夠有效地牽制住克羅地亞後防，將會大大提升阿爾巴尼亞嘅勝算。

總結嚟講，克羅地亞嘅實力同經驗略勝一籌，但都唔可以睇小阿隊嘅拼搏精神。預計今場比賽會係一場快上快落嘅激烈比賽，埋身肉搏鏡頭應該唔少，星爺認為和波機會唔細。

AI預測：

B組 克羅地亞 Vs 阿爾巴尼亞 (上午9:00)

預測賽果：克羅地亞勝

半場比分：克羅地亞 1-0 阿爾巴尼亞

全場比分：克羅地亞 2-1 阿爾巴尼亞

總入球數：3球

A組 德國 Vs 匈牙利 (中午12:00)

預測賽果：德國勝

半場比分：德國 2-0 匈牙利

全場比分：德國 3-1 匈牙利

總入球數：4球

A組 蘇格蘭 Vs 瑞士 (下午3:00)

預測賽果：瑞士勝

半場比分：蘇格蘭 1-1 瑞士

全場比分：蘇格蘭 1-2 瑞士

總入球數：3球

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。