獨家丨關寶慧因緋聞被黃日華疏遠感無奈：做咩啫 病住演40場音樂劇《青春日誌》壓力超大
關寶慧繼2019年後再參與音樂劇《我們的青春日誌》，再飾演「嚴校長」的她，臨開騷前出現呼吸系統毛病，睇極醫生都唔好，更試過咳到嘔，要捱病演出令她壓力更大。提到早前跟黃日華的緋聞翻hit，華哥否認之餘更為免誤會而疏遠她，令寶慧大感莫明其妙，她首回應事件，認為朋友之間唔需要為傳聞而避忌，無奈估計對方可能有偶像包袱。採訪：杜杜 攝影：Stanley
寶慧再獲《青春日誌》製作人陳恩碩（Tom）邀請演出，心情相當矛盾，因為未試過舞台演出超過20場，首次挑戰40場有一定壓力，「好驚，太多場數我係唔得，我個人好奇怪，每逢返學、返工，如果要每一日同樣嘅時間去同一個地點，就會唔準時㗎嘞！但係拍嘢咁耐從來冇遲到，因為唔係每日同一時間去同一地點，所以一個星期做幾場，就開始有啲驚。」不過她開心再有機會挑戰「嚴校長」一角，因2019年演出未滿意，「嗰時太趕，我係要排戲排好耐嘅人，排得一個月，仲要同另一個Cast一齊排，分得一半時間，啲歌同對白先至緊緊記熟，就要上台，覺得好唔安全。」
錯失跟張國榮合作
寶慧自爆當年讀演藝時因不肯準時返學，錯失跟張國榮合作音樂特輯《日落巴黎》機會，「King Sir（鍾景輝）叫咗我入房（扮King Sir腔）『你知唔知《日落巴嚟》揀咗你？』佢話Leslie揀咗我，我係癲咗，好開心啦！（扮King Sir腔）『但你呢個月有3次遲到，遲到係冇outside job，冇得拍』哈哈！嬲到我，終於劉雅麗、譚偉權有份拍。」
幸好今次有上次演出經驗，令寶慧減去不少壓力，「成個底都喺度，我記性又幾好，所以排一、兩次又全部記返。」不過開騷前兩日，她又遇到另一個挑戰，就是所有呼吸系統毛病同時出現，而且睇極醫生都未好，「鼻敏感、氣管敏感、手足口病，食咗隻藥又令我藥物敏感，搞到個嘴同喉嚨都腫咗，病情反覆得好緊要，仲諗緊辦法，聽日都要去睇醫生。」但寶慧完全冇諗過請假養病，「我唔可以辜負呢個機會，唔可以辜負Tom同自己，雖然啲人話喺出面聽唔覺，好好笑，喺後台任何一個角落都會聽到我啲咳聲，但一路咳臨出台我就唔咳嘞！」因她試過咳到嘔，所以一直好擔心會影響演出。
自爆唔做TVB原因
寶慧開心音樂劇成為長壽劇，舞台雖然較理工演出時細了很多，但氣氛一樣好，「由豪宅搬咗去劏房，嗰度真係好細，但係真係好神奇，雖然咁細，我哋咁多人塞喺嗰度，流暢度都一樣。我謝幕諗起EYT喎，哈哈！唔知，都係長壽嘛！我覺得幾得意，將來望返轉頭，我都有個紀錄，原來我都做咗咁多場。」不過她完全沒想過要做該劇固定演員，「我唔可以長期返一份工㗎，嗰時我啱啱入TVB，拍咗1年《我愛玫瑰園》（處境劇），我想因為咁樣而辭職，我揀做戲都係想唔定時啫！叫我朝八晚六返一份工，我真係想死，嗰年我捱到幾慘呀！」
講到因為一張2021年跟黃日華的合照而傳出婚訊，寶慧也感奇怪，得知黃日華回應時跟她劃清界線，更表示為免誤會減少跟她來往，她覺得奇上加奇，「我唔係估唔到佢咁答，係估唔到佢會因為呢件事唔敢再搵我，我覺得係有點離奇，喺我角度嚟講，做咩啫！如果真係當我朋友嘅，唔需要唔搵囉！唔緊要啦！呢個圈每個人都有自己嘅壓力，個壓力唔知嚟自咩嘅？！可能係偶包，可能係各方面嘅嘢，但我覺得可惜，喺呢個圈其實本來冇嘢，因為exposure變成好似好big deal，其實有咩咁big deal呢！？」
《星島頭條》新網站有更多精彩內容：http://www.stheadline.com/
>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。
iPhone：https://apple.co/2IBi812
Android：https://bit.ly/2Pe8anu
>>>訂閱【加拿大星島網電郵快訊】，每天可收到最快新聞資訊電郵：
https://www.singtao.ca/subscribe/singtao.php
>>>立即關注加拿大星島新聞網TG Channel，讓加國新聞無遺漏全天候向你推送：
https://t.me/singtaoca
>>>訂閱CCUE YouTube 頻道，查看更多吃喝玩樂、生活資訊影片。
