獨家丨唐唯瀚導演感謝張家輝引薦 拍《爆裂點》有林超賢帶住似上大師班

唐唯瀚首次執導電影《爆裂點》，便拍着監製兼總導演的林超賢及張家輝，作為新導演覺得好幸運，他感激林導以身教形式全程帶着他拍攝，好像讀了個大師班一樣；而相識15年的張家輝更親向林導引薦他，促成今次合作機會，回想過程也覺夢幻。採訪：杜杜

唐導最愛警匪動作類電影，未來會朝這方向發展。

 

唐導坦認首做導演，壓力確實好大。

 

唐導自演藝畢業後，20年來主力為陳木勝導演擔任副導演，每套戲均由前期跟到後期，兩人關係就像師徒，而2003年他首度為林超賢執導的《豪情》任副導，在兩大導演身上都有不少得着，「雖然佢哋都鍾意拍警匪、動作片，但鍾意嘅嘢好唔同，不過佢哋嗰種堅持、執着同膽量都好似，覺得嗰樣嘢啱就會去到尾。」而陳導和林導教後輩的方法亦好相似，「佢哋唔會話畀你聽應該點做，要靠自己觀察同吸收。」

林導為傳承決定出手幫唐導上位。

 

唐導認為物以類聚，跟林超賢和張家輝合作愉快，因是同類人。

 

林導出手補拍學到嘢

「魔鬼導演」林導出名要求高，唐導就好享受跟他合作，「我唔係畀人呵大係俾人打大，驚咩！？最緊要大家做到嘢。」作為電影總導演的林超賢，除了拍攝外，還每日幫唐導睇片，令他獲益良多，「電影尾段譚俊彥同張家輝喺水道互片嗰場，我同董瑋（動作指導）已經拍咗，但Lam導補拍咗半日，佢冇同我講要點拍，但佢補拍嗰陣我喺度，就知道自己差啲咩。」他形容拍攝過程似master class，要鳴謝林導的付出，「要借呢個機會多謝佢，佢自己又要拍，仲要睇埋我啲嘢喎！好甘㗎！一個咁勁嘅製作仲要孭住我行唔容易，邊個肯咁樣幫你！？」

唐導跟林超賢首部合作的《豪情》，同樣是三級片。

 

譚俊彥跟張家輝在水道對打這場，林導出手補拍。

 

得到難得機會，唐導感謝張家輝幫忙，兩人早在2008年合作《保持通話》認識，「套戲家輝做交通警，好奇怪拍完之後佢一路有搵我，仲將我引薦畀Lam導，演員介紹一個副導演畀另一個導演識，真係好夢幻，嗰時佢都未知我同Lam導本身都識。」事隔好幾年，家輝跟林導聚會時又提起他，「家輝話值得撐吓我，Lam導都知道我係咩人，咪促成呢件事囉！」

唐導跟張家輝結緣於電影《保持通話》。

 

唐導跟張家輝在疫情前籌備兩個合作計劃，希望能盡快成事。

 

《星島頭條》新網站有更多精彩內容：http://www.stheadline.com/

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。