头条戏场丨《Barbie芭比》快乐地接受自己甩头甩骨

好多人以为电影又粉又胶，糖衣电影笑完过瘾完散场乜事都冇发生过。导演系《不得鸟小姐》嘅Greta Gerwig，点会咁简单。场景同美术超靓，玩胶玩到言之有物，爆笑位多到数唔到，惊喜度10层楼咁高，片长两小时非常享受。以为电影已经好精彩，估唔到讨论区更癫，观众争论戏中的男权女权剧情超有火药味，芭比延伸系列一样咁好睇。(上映中) 撰文:廖思慧
 

导演表示芭比乐园会融合所有不同色阶的粉红色，重点是在什么地方要用深一点的粉色？什么地方用浅浅的？

 

超梦幻睡床。

 

芭比的衣橱

 

配合玩胶，水池当然冇水。

 

受电影《辣妹过招》桥段启发，每逢周三都鼓励剧组人员穿上粉红色衣服。工作人员对此要求非常投入认真。

 

电影并非大路娱乐片，话佢系哲学片亦唔过份，好多家长带小朋友去睇咪唔明囉?咁每个人都会有自己睇到嘅嘢，冇问题嘅。首先要赞Mattel，一间历史咁悠久嘅大公司愿意畀导演咁样奚落品牌，唔只寸仲要狠狠地玩尽黑历史，好癫。

Ken学人做大佬
一向完美的芭比(Margot Robbie饰)发现自己有口臭、脚踭踮地，大髀仲要有橙皮纹，最重要学人讲死亡，人味渐浓，大惊下求助怪芭比，挑通眼眉，讲嘢极Mean的她提议芭比去现实世界，揾返玩烂佢嘅主人搞返掂佢。由女人话晒事的Barbieland去到男人当道的现实世界，芭比寻灵魂之旅正式开始，导演亦好好利用陪芭比一齐走入现实的Ken(Ryan Gosling饰)，借呢位芭比陪衬品建构一个有严重男女冲突的麻烦世界。

芭比去到现实世界揾主人，撞正主人个口贱囡囡，寸爆𠵱家都冇人玩芭比。

 

Ryan Gosling自觉系Margot Robbie男朋友，所以陪佢去现实世界，沿途画面劲得意。

 

Margot Robbie话畀其它芭比知，佢脚踭踮到地，仲要有口臭，大家都好惊讶。

 

全部都系芭比，包括总统芭比、医生芭比、物理学家芭比等。

 

芭比每朝起身，先向邻居芭比挥手，然后刷牙、冲凉，日复日。

 

《尚气与十环帮传奇》的刘思慕都系饰演Ken，拍住Gosling做胶事亦非常好笑。

 

基本上Ryan Gosling一讲对白我就笑，因为真系好中二病，好鬼正。

 

电影有大量过瘾致敬位，由《2001太空漫游》到《阿甘正传》再到《油脂》，玩meme式笑位亦相当多，如讽刺男人睇完 《教父》自觉好多体会，真心笑出声。至于被观众鞭得最多的男女权都系面𠮶浸，其实系讲自己条命自己话事，男女都系，芭比主人Gloria(America Ferrera饰)𠮶段掴醒芭比们的一番话值得流传万世，而芭比同芭比之母Ruth的对谈亦非常重要，“就算自己个女都冇权亦冇能力去控制对方，只能留喺原地睇个女可以走到几远。”

Kate McKinnon饰演怪芭比，因被现实世界的小妹妹主人玩烂咗而命名。

 

以为甜耶耶，原来又Mean又辣又感动，笑位极多，Ryan Gosling黐鬼线爆Seed演出，接受自己唔完美真系咁难咩?

芭比同Ken着住80年代装束去现实世界，又冇身份証，被笑被拉都好正常。

 

Ken发现现实世界嘅男人好有Power，掉低芭比立即回归将Barbieland改头换面。

 

 

《星岛头条》新网站有更多精彩内容：http://www.stheadline.com/

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。