【曾智華專欄】人頭豬腦必被盡告

多年前的香港《古惑仔》系列，真的有深遠影響，搞到一代又一代懵仔，儍下儍下走去跟大佬，行古惑，聯群結隊周圍兇人，以為好威。
　　
結果？一係你劈我、我劈你，搞到周身傷，兼且生活糜爛，中年已百病叢生。最弊成日在赤柱出出入入，落得經常被追捕。
　　
早幾日又有一個頭大冇腦青年，揸住架跑車招搖過市，因切線問題，竟「江湖大佬」上身，跳下車，狂以粗口辱罵再恐嚇一名小巴司機，更明知在被拍攝情況下，自稱黑社會。
　　
唉……真係「朱錦春」！慌死人唔知佢犯罪，刑事恐嚇加毆打，再加自稱黑社會。單單錄低嘅，已涉及三條罪！
　　
好嘞，咁高調令全港震動個案，警方當然第一時間做嘢，有晒片，有晒車牌、顏色、型號，容乜易搵人吖。
　　
不過，警方行動，哎吔吔，車主慘矣。原來佢並非鴨舌帽疑犯，而是借架車畀人揸。咁就杰，再查落去，先因涉嫌「允許沒有駕駛執照的人駕駛」及「協助犯可逮捕的罪行罪犯」。簡簡單單只借車畀人，竟搞到一身蟻。
　　
執法者有個傾向，首先是告得的，盡告。如此，肯定鴨舌帽疑犯將最少幾條罪跟尾，因涉及無牌駕駛、冇第三者保險駕駛、不小心駕駛……如今正在搵窿捐，要逃避追捕也。
　　
呢名當日片中非常「威武」的江湖古惑仔，相信如今嚇到鼻哥窿冇肉，唔知點收科。
　　
其實邊有得匿吖，唯一可做，快快浮上水面自首。然後接受通宵扣查，先享受一下瞓「臭格」滋味，再逐條罪落口供。
　　
此案有晒人證物證，呢名「人頭豬腦」肯定入罪，最少踎返幾個月。因一宗切線而令自己衰成咁，再累埋朋友，真係要撼頭埋牆嘞！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。