【曾智華專欄】開關大震撼

封關兩年多，通關正式開始，此乃特區頭等大事，因為真的不知會有幾大震撼！
　　
一部車停行兩年多，要再撻著，你話可能出現幾多問題？我在香港及美加試過，莫講兩年多，只兩個月，也多數撻唔著！因為長期唔揸，電可能會走晒，冇電點撻？
　　
另外，偈油變杰，車胎漏咗一半氣。繼而其他零件，尤其逼力皮及車頭皮帶，又可能全面硬化，一郁就斷。
　　
呢呢，這個正正可能是香港突然開關必須面對的挑戰。每日放六萬人北上，然後北面落幾多來又難以估計，必定帶來各種問題，包括掃藥、衝急症室、搶針打、引入各式病毒……香港醫療系統能否頂得順呢？
　　
特首上周講，一日放六萬人，一個月一百八十萬人，兩個月三百六十六萬人，Quota一定夠用。但配套呢？能否順暢地處理？
　　
昨晚與紀律部隊大Sir晚飯，佢都冇百分百把握全部可完善處理：「摸住石頭過河啦。開關一定要，停咗咁耐，怎能不承認事事生疏？但只要有決心，一切將會逐步改善。係呢，碌Sir，你幾時再上去大灣區歎Good Food呀！」
　　
「去就一定去，但肯定要三月後，無謂同人逼，也不爭朝夕。事實我亦想睇睇由現在到農曆年後，會有乜問題出現，再作決定！」
　　
三年前，差不多每個月都回內地，最喜歡到珠海度假兩晚，真的優悠舒服。揀閒日到中港城碼頭，跳上船，前後左右多數冇人，一小時已到達。珠海碼頭絕冇羅湖或落馬洲口岸般繁忙，充滿閒逸氣氛，碼頭之外就是冷氣公共巴士，一蚊人仔已到達目的酒店。晚上走在海風輕吹大道，再歎各省名茶（珠海有齊）。這種享受，快喇快喇，諗吓都開心死。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。