【曾智華專欄】為甚麼要衝急症室？

近日又到「旺季」，間間醫院急症室逼爆，個個入去就有排輪，非緊急的，閒閒哋輪八小時。
　　
我的一生（至現在），只叫過一次白車，用過一次急症室服務，正是幾年前拖狗仔散步時，不慎頭撞路邊冷氣機鐵架，即時「爆缸」。原來額頭撞穿小小一個窿，噴血情況也會勁誇張，未覺痛已全面披血，然後滴到通地係，都咪話唔嚇人，嗌救命都冇用，先用手揑住頸部大動脈，再麻煩路人叫白車。白車十分鐘到，只不過去到急症室，就是另一個漫長等待的世界！
　　
真的無法明白，點解有咁多人少少肚痛、發燒又或感冒，都去衝急症室。事實裏面情況非常惡劣，細菌又多，好易冇病變染病！
　　
有人話因為平，這是否真像？相信絕大部分人認為，時間就是金錢，呆坐六至八小時，望住「滿目瘡痍」慘況，就為慳三兩百元，明智嗎？
　　
早年曾無數次跟白車由護老院送先母到急症室，長期直覺判斷，起碼三分一病人完全不是急症，絕對可以到坊間找一般家庭醫生。對，貴三兩百元。但若真的有弱勢階層付擔不起，政府可否直接津貼呢？反正花在急症室的每一個案費用，必定貴過三兩百元。
　　
上周老友肚痛，撞正元旦日，要求小弟陪往私家醫院睇門診。整個大堂疏疏落落，好快已見到醫生，專業又有禮，問得詳細。然後取藥，全程用上不足一小時，埋單只四百多元，竟然比一般屋邨醫生收五百元更便宜！
　　
回家不斷思考，仍是沒法明白，寧願排條幾千人隊等八小時的「急症室族」，究竟有幾多個真正需要急症服務的呢？
　　
逼爆的情況真的沒辦法解決？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。