【曾智華專欄】物有/冇所值練馬師

任何專業，看台/市場要求的是成績，是表現。尤其競技場，百分百英雄地，冇人會講同情，更冇人理你背後有幾勤力，一切只問結果（是否特首口頭禪——以結果為目標？）！
　　
馬圈當然百分百如是，無論練馬師或騎師，講到自己會飛都冇用，識唔識贏馬先？
　　
更重要，個個會問，你是否物有所值？早年小弟養過團體馬，練馬師岳敦認為要請海外頂級高手靳能做主帥，就此，全部廄內馬主，人人平分費用。老友，絕對唔平㗎！
　　
不過，當時個個心諗——有馬贏咪得囉，收到啲獎金，應夠冚返條數啩？結果，哈哈，學咗Wishful Thinking兩個英文字！因輸下一場，輸下又一場。錢就個個月夾，馬就唔多會贏。最弊，既然靳能得主帥，馬房所有出賽馬，必須優先用佢騎，慘在甚少機會拉頭馬，馬主當然嘈到拆天，紛紛揚言拉倉！
　　
講返今季，睇睇各個馬房列出的養馬費，二十二個馬房，全部收費不同。奇過蒙太奇，原來馬主畀馬房的費用，絕不與成績成正比！當中最荒謬為苗禮德，收每月六萬五千二百三十元，排第三位，與冠軍練馬師蔡約翰看齊，不過⋯⋯冇眼睇，佢贏馬數字則排在二十二位，即包尾大幡！咁嘅表現，收咁嘅價錢，難怪拉倉頻頻矣。收費最貴邊個？新開倉的黎昭昇！暫時亦是物冇所值，排第十七位，但贏得的獎金則是尾二，即只勝低班賽事。
　　
咁最抵邊個呢？登登登凳！講都唔信，正是排第二、獎金最多的告東尼！收費排十九位，平到飛起。另一位狂超值的是呂健威，差不多最平！呢兩個馬房，真係想唔爆倉就奇，簡單，若你係馬主，會點揀？
　　
明日元旦大賽馬，最有看頭當然為三級賽「華商會盃」，跑千四米，有幾匹明星馬在陣。
　　
度來度去，我決定選今季仍未勝出的「美麗同享」，此程戰積極勁，上季兩W一Q。今季跑咗四場，看似表現普通，實質愈來愈到位。上場跑一級賽第四，今次回師三級，著數晒，起筷係時候喇老友！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。