【曾智華專欄】我心又喜我心又慌

一九三九年，Hit爆粵劇《胡不歸》面世，由昔日名伶薛覺先、上海妹及半日安領銜演出。此劇對整個粵劇界影響深遠，尤其當中的《慰妻》及《哭墳》，在上世紀六十年代由新馬師曾及崔妙芝重新演繹後，幾乎任何時間聽電台，都可能在播人人識唱的兩句——「我心又喜我心又慌，何幸今宵會我郎會我郎。」
　　
呢首經典名曲，突於前日早上，由我腦袋中彈出，跟住不自覺地唱咗幾句。點解？正是見到中國閃電出手，真的是玩「Never Say Never」，突然一夜之間將病毒改名（輕微化）、不再搞隔離、全部國民及外人可以自由出入，由一月八日開始，全面將三年來的防疫政策「變天」！
　　
消息公布後，老友們奔走相告，尤其做生意的，心態中到應——我心又喜我心又慌！
　　
因無論旅遊、餐飲、零售、醫療（私家醫生）、運輸……必定全部V形反彈，生意將多到無法應付，絕對會「富貴逼人來」。
　　
不過個個又擔心，有錢都冇得賺。因各行各業咁樣「嘭」聲話開就開，而非一步步循序漸進，勢必倒瀉籮蟹，甚至亂作一團！
　　
你知我知，過去兩年，香港走咗十幾二十萬當打精英，大部分是專業人士，年齡主要在三十五到五十歲，全屬骨幹人馬。故此，就算未開關，香港根本早是零失業率，行行皆呻唔夠人。大家想知「慘」成點？睇睇各媒介的招聘廣告就知。尤其教師、社工、護理、餐飲及保安，經營後兩瓣生意的，已經不止一個拉我呻：「唉，碌Sir，如今真係大鑊到凡來見工的就請，誇張點講，識呼吸的，我已經要請，因嚴重唔夠人！」
　　
好嘞，三年疫情，大量工種根本完全停頓，業內人早紛紛轉業，如今一聲全面通關，點搵人埋位？單講旅遊車，放在「墳墓」風吹雨打冇保養三年，架架甩皮甩骨，要逐一再維修才可投入服務。好嘞，有車，又邊度搵司機？
　　
總之，諗吓一月八日後的景況也會心慌得更甚。老友指：「如今擺錢入銀行，大額存款印印腳收五厘息。為乜仲搏呀？未辛苦過乎？」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。