【曾智華專欄】快活谷跑道專家

香港有兩個馬場、三條跑道：沙田草、沙田泥及快活谷草，各有不同的特色、不同設計。騎師要贏馬，當然首先講馬匹實力，其次是騎功、馬匹狀態、擅長、血統、檔位⋯⋯另有一個極重要因素，為騎師閱讀跑道的能力。尤其快活谷，因為彎多，要上坡落坡，入直路時必須掌握平衡術，否則極易波勾失位。
　　
新時代，一切讀大數據，而數據正是綜合千千萬萬個調查結果而來，非常精準。故此，任何大集團，產品推出前，必定參考相關的大數據，絕少純以「老闆直覺為依歸」咁落後。
　　
當然，政治更百分百如是。有咗數據，政客選舉時，就可集中火力主攻某一範疇，以爭取最多選票。這方面，計算已經非常科學化。
　　
香港賽馬，若論騎功及贏馬之多，根本再冇人可以同潘頓揮，彈離太太太太遠了。不過，若單論快活谷的戰績及跑道閱讀能力，又唔同，這方面何澤堯絕對比潘頓優勝。數字說明一切，以下為兩人在跑馬地的冠、亞、季數字：冠——何二十一、潘十八；亞——何十四、潘十二；季——何十四、潘九。明顯有距離，點解？其實以潘的揀馬牙力，一定比任何騎師的牙力大，可優先搶得較高質素的賽駒。這情況下，何仍勝潘，已可下結論，何澤堯閱讀快活谷賽道能力，比潘頓優勝。大家若揸住這數據投注，一定可以輸少好多，因有人替你做晒功課。
　　
就以上周三為例，兩人入Q場次，共七場，當中一場串Q。意即，若你Q、PQ、T、二重彩及四重彩冇買兩人，輸咗七場！犀唔犀利？
　　
我通常投注二重彩複式五穿十，五蚊注，內裏一定有佢兩個，故此，場場有得「嗌」，一半場次有錢收。雖熱，但勝在有強烈滿足感。
　　
又睇睇今晚個陣！何澤堯上周六在沙田食白果，咁回到自己「主場」，當然要發威啦。騎足九場，應該冇一隻大熱，意即勝出會較好分。W、P我捧「育成精彩」、「精算其然」及「川河冠駒」。有一隻冷品「得力寶駒」，刻意轉場，有機會爆！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。